विश्वकप २०२६: ब्राजिल समूह 'सी' को विजेता, मोरक्को पनि नकआउट चरणमा

खेलकुद

गृहपृष्ठ
खेलकुद
विश्वकप २०२६: ब्राजिल समूह 'सी' को विजेता, मोरक्को पनि नकआउट चरणमा

विश्वकप २०२६: ब्राजिल समूह 'सी' को विजेता, मोरक्को पनि नकआउट चरणमा

बिहीबार, असार ११, २०८३ बागेश्वरी पोस्ट

काठमाडौँ । फिफा विश्वकप २०२६ अन्तर्गत समूह चरणका अन्तिम खेलहरूमा ब्राजिल, मोरक्को, मेक्सिको र दक्षिण अफ्रिकाले महत्वपूर्ण जित हात पार्दै नकआउट चरणमा स्थान सुरक्षित गरेका छन्।

समूह ‘सी’ अन्तर्गत भएको खेलमा ब्राजिलले स्कटल्यान्डलाई ३–० गोलले पराजित गर्दै समूह विजेताको रूपमा अन्तिम ३२ मा प्रवेश गरेको छ। ब्राजिलका लागि भिनिसियस जुनियरले ७औँ मिनेटमा गोल गर्दै टोलीलाई अग्रता दिलाएका थिए। उनले पहिलो हाफको अतिरिक्त समयमा व्यक्तिगत दोस्रो गोल गरे भने माटेउस कुन्हाले ६०औँ मिनेटमा अर्को गोल थप्दै ब्राजिलको सहज जित सुनिश्चित गरे। तीन खेलबाट दुई जित र एक बराबरीसहित ७ अंक जोडेको ब्राजिल समूहको शीर्ष स्थानमा रह्यो।

यस्तै, अर्को खेलमा मोरक्कोले हैटीलाई ४–२ गोलले हराउँदै समूह उपविजेताका रूपमा नकआउट चरणमा प्रवेश गरेको छ। मोरक्कोका लागि अचरफ हाकिमी, इस्माइल साइबारी, सौफियान रहिमी र यासिनेले गोल गरे। हैटीका लागि एक गोल मोरक्कोका गोलरक्षक यासिन बोनोको आत्मघाती गोलबाट तथा अर्को विल्सन इसिडोरले गरेका थिए।

उता समूह ‘ए’ का खेलहरूमा मेक्सिकोले चेकियामाथि ३–० को प्रभावशाली जित निकाल्यो। मेक्सिकोका लागि मिगुएल चाभेज, जुलियन क्विनोनेस र आल्भारो फिडाल्गोले गोल गरे। अर्को खेलमा दक्षिण अफ्रिकाले दक्षिण कोरियालाई १–० गोलले पराजित गर्दा थाबाङ मासेकोले निर्णायक गोल गरेका थिए।

समूह ‘ए’ को अन्तिम अंकतालिकाअनुसार मेक्सिको समूह विजेता र दक्षिण अफ्रिका उपविजेता बन्दै नकआउट चरणमा पुगेका छन् भने दक्षिण कोरिया र चेकियाको यात्रा समूह चरणमै समाप्त भएको छ। ब्राजिल, मोरक्को, मेक्सिको र दक्षिण अफ्रिकाले अन्तिम ३२ मा स्थान बनाउँदै उपाधि यात्रालाई निरन्तरता दिएका छन्।

प्रकाशित मिति: बिहीबार, असार ११, २०८३ ०९:०२

प्रतिक्रिया दिनुहोस्