फिफा विश्वकप २०२६: अन्तिम १६ को समीकरण पूरा

खेलकुद

गृहपृष्ठ
खेलकुद
फिफा विश्वकप २०२६: अन्तिम १६ को समीकरण पूरा

फिफा विश्वकप २०२६: अन्तिम १६ को समीकरण पूरा

शनिबार, असार २०, २०८३ बागेश्वरी पोस्ट

नेपालगञ्ज । अमेरिका, क्यानाडा र मेक्सिकोमा जारी २०२६ फिफा विश्वकप फुटबलको प्रिक्वार्टरफाइनल (अन्तिम १६) को समीकरण पूरा भएको छ । राउण्ड अफ ३२ अन्तर्गतको अन्तिम खेलमा कोलम्बियाले घानालाई १–० ले पराजित गरेसँगै प्रिक्वार्टरफाइनल पुग्ने सबै १६ टोलीको टुंगो लागेको हो ।

कोलम्बियाको जितमा खेलको १४औँ मिनेटमा जोन एरिआसले लुइस सुवारेजको पासमा गरेको गोल नै निर्णायक बन्यो । सोही गोलको आधारमा कोलम्बियाले अन्तिम १६ मा स्थान सुरक्षित गरेको हो ।

पहिलो पटक ४८ टोलीको सहभागिता रहेको विश्वकपमा समूह चरणबाट ३२ टोली नकआउट चरणमा पुगेका थिए । अन्तिम ३२ का खेल सम्पन्न भएसँगै अब १६ टोली उपाधि दौडमा कायम रहेका छन् भने १६ टोली प्रतियोगिताबाट बाहिरिएका छन् ।

प्रिक्वार्टरफाइनलमा स्थान बनाउने टोलीहरूमा क्यानाडा, ब्राजिल, पाराग्वे, मोरक्को, नर्वे, फ्रान्स, मेक्सिको, इङ्ग्ल्यान्ड, बेल्जियम, अमेरिका, स्पेन, पोर्चुगल, स्वीट्जरल्यान्ड, इजिप्ट, अर्जेन्टिना र कोलम्बिया रहेका छन् ।

अन्तिम ३२ का खेलमा क्यानडाले दक्षिण अफ्रिकालाई १–०, ब्राजिलले जापानलाई २–१, पाराग्वेले जर्मनीलाई पेनाल्टी सुटआउटमा ४–३, मोरक्कोले नेदरल्यान्ड्सलाई पेनाल्टी सुटआउटमा ३–२ तथा नर्वेले आइभरी कोस्टलाई २–१ ले पराजित गरेका थिए ।

यस्तै फ्रान्सले केलियन एम्बाप्पेको दुई गोलको मद्दतमा स्विडेनलाई ३–०, मेक्सिकोले इक्वेडरलाई २–०, इङ्ग्ल्यान्डले डीआर कङ्गोलाई २–१, बेल्जियमले सेनेगललाई ३–२ तथा अमेरिकाले बोस्निया एन्ड हर्जगोभिनालाई २–१ ले हराएका थिए ।

स्पेनले अस्ट्रियालाई ३–०, पोर्चुगलले क्रोएसियालाई २–१, स्वीट्जरल्यान्डले अल्जेरियालाई २–१ ले पराजित गर्दा इजिप्टले अस्ट्रेलियालाई पेनाल्टी सुटआउटमा ४–२ ले हराएको थियो । अर्जेन्टिनाले केप भर्डेलाई ३–२ तथा कोलम्बियाले घानालाई १–० ले पराजित गर्दै अन्तिम १६ को अन्तिम स्थान सुरक्षित गरेको हो । अब प्रिक्वार्टरफाइनलका रोमाञ्चक प्रतिस्पर्धाबाट क्वार्टरफाइनल पुग्ने आठ टोलीको टुंगो लाग्नेछ ।

अब प्रिक्वार्टरफाइनलमा क्यानाडा–मोरक्को, पाराग्वे–फ्रान्स, ब्राजिल–नर्वे, मेक्सिको–इङ्ग्ल्यान्ड, पोर्चुगल–स्पेन, अमेरिका–बेल्जियम, अर्जेन्टिना–इजिप्ट तथा स्वीट्जरल्यान्ड–कोलम्बियाबीच प्रतिस्पर्धा हुनेछ ।

प्रकाशित मिति: शनिबार, असार २०, २०८३ १०:११

प्रतिक्रिया दिनुहोस्