नेपालगञ्जको वडा नम्बर ६ मा अन्तर्राष्ट्रिय क्रिकेट रंगशाला बन्ने पक्का

खेलकुद

गृहपृष्ठ
खेलकुद
नेपालगञ्जको वडा नम्बर ६ मा अन्तर्राष्ट्रिय क्रिकेट रंगशाला बन्ने पक्का

नेपालगञ्जको वडा नम्बर ६ मा अन्तर्राष्ट्रिय क्रिकेट रंगशाला बन्ने पक्का

सोमबार, असार २९, २०७७ बागेश्वरी पोस्ट

नेपालगञ्ज । नेपालगञ्जमा अन्तर्राष्ट्रिय क्रिकेट रंगशाला निर्माणका लागि सर्वपक्षीय सहमति जुटेको छ । नेपालगञ्ज उपमहानगरपालिकाका मेयर डा. धवलशम्शेर राणाको अध्यक्षतामा आज भएको सर्वदलीय तथा सर्वपक्षीय बैठकमा उपमहानगरपालिका वडा नम्बर ६ स्थित फुल्टेक्रा ताल र कर्वलाको जग्गामा प्रस्तावित नेपालगञ्ज अन्तर्राष्ट्रिय क्रिकेट रंगशाला निर्माणका लागि जग्गा बाँडफाँडमा सहमति जुटेको छ ।

बैठकमा रंगशाला निर्माण, मुस्लिम समुदायको कर्वला निर्माण, ६ नम्बर वडा कार्यालय तथा हिन्दुहरुको मुर्चुवा पुजास्थल निर्माण, भौतिक संरचना निर्माणका लागि उपमहानगरपालिकाले प्रस्ताव गरेको नक्सालाई सामान्य हेरफेर गरी पश्चिमतर्फ मुस्लिम समुदायको कर्वला धार्मिक पर्यटकीय स्थल बनाउने, पुर्वतर्फ वडा कार्यालय र पूर्व उत्तरतर्फ हिन्दुहरुको मुर्चुवा पुजा स्थल निर्माण गर्ने सर्वसम्मतिबाट निर्णय गर्दै जग्गा बाँडफाँडका लागि वडा कार्यालयमा आवश्यक कागजात पेश गर्ने निर्णय गरिएको छ । धार्मिक पर्यटकीय स्थलका लागि छुट्टाइएको जग्गामा आ–आफ्नो प्रचलन अनुसार पुजापाठ गर्ने तर कुनै किसिमको मन्दिर, मस्जिद, कव्रस्थान, समशानघाट, नियमित पुजा, अजान संचालन नगर्ने निर्णय गरिएको छ ।

राजनीतिक दलका नेता, मुस्लिम समुदायका अगुवा र वडाका जननिर्वाचित प्रतिनिधि लगायतको उपस्थिति रहेको बैठकले नक्सामा बन्ने संरचना निर्माणका लागि उपमहानगरपालिकाले नेतृत्वदायी पहल गर्ने निर्णय गरेको छ । बैठकमा मेयर डा. राणाले लामो समयको प्रयासपछि रंगशाला निर्माणका लागि सहमति जुटेको भन्दै तत्काल निर्माण कार्य सुरु गर्ने बताउनुभयो । रंगशाला निर्माणका लागि आइसिसी, संघ र प्रदेश सरकार समक्ष पहल गर्ने बताउनुभयो । यस वर्ष माटो पटानका लागि एक करोड बजेट छ । यसैगरी पर्खाल

निर्माणका लागि एक करोड ५० लाख रुपैयाँ बजेट रहेको छ । बैठकमा क्रिकेट मैदान स्थान छनौट समितिका संयोजक तथा सहजीकरण समितिका संयोजक सुनिलसिंह हमालले छिटो भन्दा छिटो नेपालगञ्जमा अन्तर्राष्ट्रियस्तरको क्रिकेट मैदान निर्माणका लागि अघि बढेको बताउनुभयो ।

बैठकमा नेकपाका केन्द्रिय सदस्य मोहम्मद हारुन, नेपालगञ्ज नगर अध्यक्ष डिल्ली बराल, प्रदेशसभा सदस्य मोहम्मद याकुब अन्सारी, काँग्रेस नगर सभापति प्रशान्त विष्ट लगायत विभिन्न राजनीतिक दलका प्रतिनिधिको सहभागिता थियो । बैठकमा वडा अध्यक्ष समिरप्रताप सिंहले वडाभित्र अन्तर्राष्ट्रिय स्तरको रंगशाला निर्माण हुनु वडाबासी र नगरबासीका लागि खुशीको क्षण भएको बताउनुभयो ।

११ बिघा ६ कठ्ठा जग्गा मध्ये रंगशालाका लागि ३ विघा ३ कठ्ठा, पेभिलियनका लागि ५ कठ्ठा, कर्वलाका लागि ३ विघा, हिन्दु मुर्चुवाका लागि २ विघा ३ कठ्ठा र वडा कार्यालयका लागि ३ कठ्ठा जग्गा छुट्टाइएको छ ।

प्रकाशित मिति: सोमबार, असार २९, २०७७ १९:०६