खजुराको गौघाटमा अन्तरक्लब भलिबल हुँदै

खेलकुद

गृहपृष्ठ
खेलकुद
खजुराको गौघाटमा अन्तरक्लब भलिबल हुँदै

खजुराको गौघाटमा अन्तरक्लब भलिबल हुँदै

शनिबार, पुस ११, २०७७ बागेश्वरी पोस्ट

नेपालगन्ज । माघी पर्वको अवसरमा बाँकेको खजुरामा अन्तरक्लब स्तरीय खुला पुरुष भलिबल प्रतियोगिता हुने भएको छ । माघको १ गतेदेखि सुरु हुने प्रतियोगितामा खजुरा क्षेत्रका क्लबको सहभागिता रहने आयोजक योगिनी युवा क्लबले बताएको छ । योगिनी युवा क्लबका अध्यक्ष तरिन्द्र थापाले ग्रामीण क्षेत्रबाट भलिबल खेलाडी उत्पादन गर्ने लक्ष्य सहित प्रतियोगिता गर्न लागेको बताउनुभयो । बाँकेको खजुरा गाउँपालिका वडा नम्बर २ गौघाटमा विगतमा भलिबलको स्तरीय प्रतियोगिता हुने गरेको थियो । तर, पछिल्लो समय यस क्षेत्रमा भलिबलका गतिविधि कम भएका छन् ।

भलिबल खेलमा स्थानीय युवाहरुको आर्कषण देखिएकोले पनि भलिबल प्रतियोगिता गर्न लागेको अध्यक्ष थापाले बताउनुभयो । उहाँले भन्नुभयो, ‘विगतमा हाम्रो गाउँमा क्षेत्रीय स्तरको प्रतियोगिता भएको इतिहास छ । यहाँबाट राष्ट्रिय स्तरको खेलाडीको उत्पादन भएका थिए । तर, विविध कारणले पछिल्लो समय यस क्षेत्रमा स्तरीय प्रतियोगिता हुन सकेको छैन । हाम्रो क्लब युवाहरुलाई सशक्त बनाएर समाजको विकासका लागि काम गरिरहेको क्लब हो । यसले खेलकुदका माध्यमबाट युवाहरुलाई सामाजिक भावनाको विकास गराउनमा पनि उत्प्रेरित गर्छ ।’ आज क्लबको बैठकले प्रतियोगिता गर्ने निर्णय गरेको हो । प्रतियोगिताको आयोजनाको लागि दिलिप महतारा संयोजक र हरेन्द्र राईलाई संहसंयोजकको जिम्मेवारी दिइएको छ ।

प्रतियोगिताको विजेतालाई २० हजार र उपविजेतालाई १० हजार र प्रतियोगिताको सर्वोत्कृष्ट खेलाडीलाई ५ हजार तथा मेडल प्रदान गर्ने निर्णय भएको अध्यक्ष थापाले बताउनुभयो । योगिनी युवा क्लबले एक वर्ष अघि सहयोगी आवाज (हिभ) नेपालसँग सहकार्य गरेर प्रथम योगिनी कप फुटबल प्रतियोगिताको आयोजना गरेको थियो । कोरोनाका कारण दोस्रो संस्करण प्रभावित भएको क्लबले बताएको छ ।

प्रकाशित मिति: शनिबार, पुस ११, २०७७ १८:३६

प्रतिक्रिया दिनुहोस्