पोखरामा प्रथम मनिपाल न्यूरो सम्मेलन,बेहोश नबनाई दुरबिनबाट गरियो ढाडको अप्रेशन

स्वास्थ्य

गृहपृष्ठ
स्वास्थ्य
पोखरामा प्रथम मनिपाल न्यूरो सम्मेलन,बेहोश नबनाई दुरबिनबाट गरियो ढाडको अप्रेशन

पोखरामा प्रथम मनिपाल न्यूरो सम्मेलन,बेहोश नबनाई दुरबिनबाट गरियो ढाडको अप्रेशन

सोमबार, मंसिर ३०, २०७६ बागेश्वरी पोस्ट

पोखरा । पोखरामा प्रथम राष्ट्रिय न्युरो सम्मेलन गरिएको छ । मणिपाल मेडिकल कलेजको २५ औं बार्षिक उत्सबका अवसरमा नेपाल न्यूरो सर्जिकल सोसाइटी, मणिपाल मेडिकल कलेज एवम् ब्रेन एण्ड स्पाइनल फाउण्डेशन नेपालको आयोजनामा प्रथम राष्ट्रिय न्युरो सम्मेलन गरिएको हो ।

मंसिर २७ र २८ गते गरिएको सम्मेलनमा पहिलो दिन भारतका प्राध्यापक डा. सतिशचन्द्र गोरे र प्राध्यापक डा. रविन्द्रनाथ कोमी तथा मणिपाल मेडिकल कलेजका न्युरो सर्जरी विभागका प्राध्यापक डा.बालगोपाल कर्माचार्य र डा.निकुञ्ज योगीको टोलीले बेहोस नबनाई दुरबिनबाट गरिने ढाडको अपरेशन सफलतापूर्वक सम्पन्न गरेको डा.योगीले जानकारी दिनुभयो । सम्मेलनको दोस्रो दिन नेपालका प्रथम न्युरो सर्जन स्वर्गीय डा.उपेन्द्र देवकोटाको सम्झनामा विशेष कार्यक्रम गरिएको थियो । दोस्रो दिनमै ५३ वटा क्लिनिकल रिसर्चका बारेमा सहभागीहरु बीच छलफल गरिएको डा.योगीले बताउनुभयो ।

मणिपाल मेडिकल कलेजका डिन डा.बिएम नागपाल तथा नेपाल न्युरो सर्जिकल सोसाइटीका अध्यक्ष डा.कृष्ण शर्माले दिप प्रज्ज्वलन गरी शुरु गर्नुभएको राष्ट्रिय न्युरो सम्मेलनमा देश विदेशका गरी करिब १ सय ३० जना न्युरो सर्जन, न्युरोलोजिष्ट, स्पाइनल सर्जन, फिजियोथेरापिष्ट र नर्सहरुको सहभागिता थियो । सम्मेलनमा नेपालका बरिष्ठ न्युरो सर्जन डा.बसन्त पन्त, डा.कृष्ण शर्मा,डा.निलम खड्का, न्युरोलोजिष्ट डा.लेखजंग थापा लगायत सहभागी हुनुहुन्थ्यो । बेहोस नबनाई दुरबिनको प्रयोग गरेर ढाडको अप्रेशन गरिएका विरामीहरुले आफूहरु अप्रेशन लगत्तै हिंड्डुल गर्न सकेको र कुनै दुःखाई महसुस नगरिएको बताएका थिए ।

देशकै दुर्लभ यसखाले अप्रेशनका लागि मणिपाल मेडिकल कलेजले पनि छिट्टै यो प्रविधिको सुरुवात गर्ने प्रतिबद्धता जनाएको छ । कलेजका डिन डा.नागपालले सम्मेलन सफलतापूर्वक सम्पन्न भएकोमा खुसी ब्यक्त गर्नुभएको न्युरो सर्जन डा.योगीले बताउनुभयो । सम्मेलनमा काठमाडौं स्थित बाँसबारी न्यूरो अस्पतालकि डा. रचना नकर्मी, मनिपाल न्यूरो सर्जरी बिभागका सह-प्राध्यापक लगायतको टोलीले बिशेष सहयोग समेत गरेको थियो।