दाङ-३ मा टिकटक प्रतियोगिता, सोमबारसम्म पठाइसक्नुपर्ने

आम निर्वाचन-२०७९

गृहपृष्ठ
आम निर्वाचन-२०७९
दाङ-३ मा टिकटक प्रतियोगिता, सोमबारसम्म पठाइसक्नुपर्ने

दाङ-३ मा टिकटक प्रतियोगिता, सोमबारसम्म पठाइसक्नुपर्ने

शुक्रबार, कात्तिक २५, २०७९ बागेश्वरी पोस्ट

तुलसीपुर (दाङ) । यही मंसिर ४ गते हुन गइरहेको प्रतिनिधिसभा तथा प्रदेशसभा चुनावका लागि दाङ-३ मा गठबन्धनका उम्मेदवारहरु दीपक गिरी (प्रतिनिधिसभा सदस्य), डिल्लीबहादुर चौधरी (प्रदेशसभा सदस्य ३ (१) तथा धन बहादुर मास्की 'राजेश' (प्रदेशसभा सदस्य ३ (२) को चुनाव प्रचारका लागि रोचक टिकटक बनाउने युवायुवतीलाई नेपाली जनसम्पर्क समिति, क्यानडाले आकर्षक पुरष्कार प्रदान गर्ने भएको छ । आयोजकहरुका अनुसार टिकटक सामग्री यही सोमबार कार्तिक २८ गते दिउँसो १२ बजेभित्र [email protected] मा पठाउनुपर्नेछ ।

उत्कृष्ट टिकटक बनाउने व्यक्तिहरुलाई क्रमशः रु. ३० हजार (प्रथम), रु. २० हजार (द्वितीय) र रु. १० हजार (तृतीय) पुरस्कार प्रदान गरिनेछ । त्यस्तै सबैभन्दा बढी टिकटक शेयर गर्ने एक र सबैभन्दा बढी भ्युज प्राप्त टिकटक एक गरी २ जनालाई जनही रु. १० हजार पुरस्कार प्रदान गरिनेछ । तीन सदस्यीय निर्णायक समितिले पुरष्कृतहरुको छनोट गर्ने र निर्णायक समितिको निर्णय अन्तिम हुने बताइएको छ ।

टिकटक बनाउने व्यक्ति साविक राप्ती अञ्चलवासी तथा ४० वर्ष मुनिको हुनुपर्ने र पुरस्कृत व्यक्तित्वहरुलाई यही मंसिर १ गते दाङ तुलसीपुरमा एक कार्यक्रम गरी नगद पुरस्कार प्रदान गरिने आयोजकले जनाएको छ । उक्त टिकटक प्रतियोगिताका लागि पुरष्कारको प्रायोजन गर्ने नेपाली जनसम्पर्क समिति, क्यानडाका अध्यक्ष बुद्धिप्रकाश ओलीले स्थानीय भाषा, संगीत र कलालाई प्रवर्द्धन गर्ने खालको टिकटक बनाउन आग्रह गरे । कुनै दल, प्रतिपक्षी उम्मेदवार, जातजाति वा समुदायको अपमान गर्ने खालका सामग्रीलाई प्रतियोगितामा समावेश नगरिने उनले बताए ।

'यो चुनाव सामान्य आवधिक चुनाव मात्रै नभएर संविधानको रक्षा र विकास गर्ने पक्षधरहरु तथा प्रतिगमन पक्षधरहरु बीच भइरहेकाले संविधानको रक्षा गर्न हामीले यो प्रतियोगिता आयोजना गरेका हौँ,' दाङ्ग लमही घर भई हाल क्यानाडामा बस्ने ओलीले भने । खासगरी युवा युवतीहरुमा सिर्जनशीलता र रचनात्मकतालाई बढावा दिने उद्देश्यले युवाहरुमा लोकप्रिय टिकटक प्रतियोगिता आयोजना गर्न लागिएको पनि उनले बताए ।

No description available.