मनिकापुरमा एमाले–राप्रपाको संयुक्त चुनावी सभा

आम निर्वाचन-२०७९

गृहपृष्ठ
आम निर्वाचन-२०७९
मनिकापुरमा एमाले–राप्रपाको संयुक्त चुनावी सभा

मनिकापुरमा एमाले–राप्रपाको संयुक्त चुनावी सभा

शनिबार, कात्तिक २६, २०७९ बागेश्वरी पोस्ट

नेपालगञ्ज । नेपालगञ्ज उपमहानगरपालिका वडा नम्बर २० मनिकापुरमा आज नेकपा एमाले र राप्रपाको संयुक्त चुनावी सभा सम्पन्न भएको छ ।

आमसभालाई सम्वोधन गर्दै बाँके क्षेत्र नं. २ बाट प्रतिनिधिसभा सदस्य उम्मेदवार डा. धवलशम्शेर राणाले चुनावको बेला भोट किन्ने उम्मेदवारको पछि नलाग्न मतदातालाई आग्रह गरे । ‘निर्वाचनको बेला पैसा, धोती र चामल बाँड्ने दलाल घर–घर छिर्ने क्रम सुरु भएको छ, भोट किनेर चुनाव जितौंला भन्ने ख्वाब कसैले नदेखे हुन्छ’, उनले भने ,‘अब जनता सचेत भइसकेका छन्, आफ्नो वुद्धिमतापूर्ण निर्णयले मतदान गर्नेछन् ।’ बाँके क्षेत्र नम्बर २ मा नेकपा एमाले–राप्रपा तालमेलका उम्मेदवार जिताउन वडावासी जनताहरु अझ चनाखोपूर्ण तरिकाले लाग्नुपर्ने अवस्था आएको उनले उल्लेख गरे ।

कार्यक्रममा प्रदेशसभा सदस्य उम्मेदवार बिजयबहादुर यादवले बाँके क्षेत्र नं. २ को समग्र विकास र समृद्धिको लागि नेकपा एमाले–राप्रपा तालमेलका उम्मेदवारलाई जिताउन दुवै पार्टीका स्थानीय नेता कार्यकर्तालाई एकजुट भएर लाग्न आग्रह गरे । चुनावी प्रचारका लागि मनिकापुरमा आज आयोजित चुनावी सभामा उल्लेख्यरुपमा जनसहभागिता रहेको नेकपा एमाले जिल्ला कमिटी सदस्य एवम् स्थानीय नेता कृष्ण कार्कीले जानकारी दिए ।

प्रकाशित मिति: शनिबार, कात्तिक २६, २०७९ २१:३७