डुडुवाको १३औं गाउँसभाद्वारा बजेट तथा कार्यक्रम संशोधन

स्थानीय

गृहपृष्ठ
स्थानीय
डुडुवाको १३औं गाउँसभाद्वारा बजेट तथा कार्यक्रम संशोधन

डुडुवाको १३औं गाउँसभाद्वारा बजेट तथा कार्यक्रम संशोधन

शुक्रबार, जेठ १२, २०८० बागेश्वरी पोस्ट

डुडुवा (बाँके) । डुडुवा गाउँपालिकाको १३औँ गाउँसभाले बजेट तथा कार्यक्रम संशोधन गरेको छ । आज बसेको गाउँसभामा अध्यक्ष नरेन्द्रकुमार चौधरीले चालू आर्थिक वर्षको संशोधन बजेट तथा कार्यक्रम प्रस्तुत गरेका थिए ।

चालू आर्थिक वर्षमा गाउँपालिकाको नीति कार्यक्रम तथा बजेटबाट बिनियोजित कार्यक्रमहरु कार्यावन्यन गर्ने क्रममा नेपाल सरकार संघीय अर्थ मन्त्रालयको परिपत्र तथा निर्णयबाट बिनियोजित विभिन्न अनुदान रकम कटौती भएपछि योजना तथा कार्यक्रम संचालन हुन सकेन । बजेट कटौतीले गाउँपालिकाबाट चालू आर्थिक वर्षका लागि प्रस्तावित विभिन्न (चालूगत तथा पूँजीगत) कार्यक्रमहरु कार्यावन्यन हुन नसकेको र आन्तरिक स्रोततर्फको नदीजन्य पदार्थको ठेक्का बन्दोबस्त हुन नसकेको, विकास निर्माणका कार्यमा स्रोत अभावका कारण कार्यान्वयन हुन नसकेको अध्यक्ष चौधरीले संशोधन प्रस्तावमार्फत जानकारी गराएका थिए ।

हाल संचालनमा रहेका विभिन्न आयोजनामा स्रोत सुनिश्चिता गर्नुपर्ने र कार्यालय संचालनका लागि अनिवार्य दायित्वहरु तलबभत्ता, पानी, बिजुली, पदाधिकारी सेवा सुविधा, इन्धन, सञ्चार र मसलन्द तथा कार्यालय सामग्री शिर्षकमा समेत स्रोत सुनिश्चित गरी भुक्तानी गर्न चालू आर्थिक वर्षको कार्यक्रमको संशोधन प्रस्ताव सर्वसम्मतरुपमा पारित गरिएको हो । सभामा अध्यक्ष चौधरीले चालू आर्थिक वर्षमा जनप्रतिनिधिबीच आपसी विवाद, ढिलो गरी बजेट पास र आर्थिक मन्दीले सरकारले गरेको बजेट कटौतीले गाउँपालिकाले खासै उपलब्धि हासिल गर्न नसकेको भन्दै नयाँ आर्थिक वर्षदेखि विशेष कार्यक्रम तथा अभियान लागू गरी लुम्विनी प्रदेशकै नमुना पालिका बनाउने लक्ष्यका साथ अघि बढ्ने बताए ।

सभामा उपाध्यक्ष शाहिदा बानो, वडाध्यक्षहरु पटेश्वर कुर्मी, दुर्गाप्रसाद बर्मा, आमोद तिवारी, सगिर खाँले पनि योजना तथा कार्यक्रमका बारेमा बोलेका थिए । सदस्य सचिव अशोककुमार पाण्डेले सञ्चालन गरेको गाउँसभामा ३२ जना सभासदमध्ये २२ जनाको उपस्थिति रहेको थियो । स्थानीय सरकार सञ्चालन ऐन २०७४ अनुसार प्रत्येक आर्थिक वर्षमा कम्तीमा दुई पटक गाउँसभा बस्नुपर्ने प्रावधान अनुरुप सभा बसेको हो ।

प्रकाशित मिति: शुक्रबार, जेठ १२, २०८० २१:२९