नरैनापुरमा आगलागी हुँदा १२ घरगोठ जले, करिब १८ लाखको क्षती

स्थानीय

गृहपृष्ठ
स्थानीय
नरैनापुरमा आगलागी हुँदा १२ घरगोठ जले, करिब १८ लाखको क्षती

नरैनापुरमा आगलागी हुँदा १२ घरगोठ जले, करिब १८ लाखको क्षती

रेडक्रसद्वारा गैरखाद्य राहत वितरण

आइतबार, जेठ १४, २०८० बागेश्वरी पोस्ट

नरैनापुर (बाँके) । नरैनापुर गाउँपालिका वडा नम्बर ५ को जमुनाहा गाउँमा आगलागी हुँदा १२ घरगोठ जलेर नष्ट भएका छन् । आगलागीबाट करिब १८ लाख बराबरको क्षती भएको अनुमान गरिएको छ ।

आज मध्यान्ह १२ बजेतिर केशव यादवको फुसले छाएको कच्ची घरबाट आगलागी सुरु भएको इलाका प्रहरी कार्यालय भगवानपुरले जनाएको छ । स्थानीयबासी, दमकल र प्रहरीको सहयोगमा करिब ३ बजेतिर आगो नियन्त्रणमा आएको थियो । आगलागीबाट फुसले छाएका ११ वटा घर र एउटा गोठ पूर्णरुपमा जलेर नष्ट भएका हुन् ।

केशव यादव, जब्बर खाँ, रञ्जु यादव, बिहारीलाल कुम्हार, लहरी कुम्हार, अज्ञराम कुम्हार, लालमन यादव, रामचन्द्र लोहार, सल्मान खाँ, राजकरण कुम्हार र बन्सीलाल यादवको फुसले छाएको कच्ची घर, घरभित्र रहेको अन्नपात र लत्ताकपडा जलेर नष्ट भएको प्रहरीले जनाएको छ ।

यस्तै फकिरे खाँको फुसले छाएको कच्ची गोठ पूर्णरुपमा जलेर नष्ट भएको छ । आगलागीबाट १७ लाख ८० हजार बराबरको क्षती भएको अनुमान छ । यसैबीच आगलागी पीडितलाई नेपाल रेडक्रस सोसाइटी बाँके शाखाले ८ हजार मूल्य बराबरको गैरखाद्य सामग्री वितरण गरेको रेडक्रसका प्रल्हाद विश्वकर्माले बताए । गाउँपालिकाका अध्यक्ष इश्तियाक अहमद शाह र वडा अध्यक्ष कृष्णचन्द्र मौर्यले राहत वितरण गरेका हुन् ।

प्रकाशित मिति: आइतबार, जेठ १४, २०८० २१:३३