विपदमा अपांगता भएकालाई सुरक्षित राख्न सचेतीकरण

स्थानीय

गृहपृष्ठ
स्थानीय
विपदमा अपांगता भएकालाई सुरक्षित राख्न सचेतीकरण

विपदमा अपांगता भएकालाई सुरक्षित राख्न सचेतीकरण

शुक्रबार, जेठ २६, २०८० बागेश्वरी पोस्ट

नेपालगञ्ज । अपांगता भएकाहरुलाई विपदका बेला सुरक्षित राख्न सचेतीकरण गर्ने उद्देश्यले अभिमुखीकरण गरिएको छ । नेपालगञ्ज भूकम्प र आगलागीको उच्च जोखिममा रहेको अवस्थालाई मध्यनजर गर्दै अपांगता समावेशी विपद जोखिम न्यूनीकरण सम्बन्धि अभिमुखीकरण गरिएको हो ।

युरोपियन युनियनको आर्थिक सहयोग तथा युएनडिपी, युनिसेफ र युएन ओमनको साझेदारी तथा नेपाल रेडक्रस सोसाइटी बाँके शाखा र सिडिएमको प्राविधिक सहयोगमा नेपालगञ्ज उपमहानगरपालिकामा संचालित शहरी विपद् तथा भूकम्पीय पूर्व तयारी परियोजना (सुपर प्राजेक्ट) अन्तर्गत नेपालगञ्ज नगर स्तरीय अपांग महासंघको समन्वयमा अपांगता भएकाहरुलाई अभिमुखीकरण गरिएकोे हो ।

अभिमुखीकरण कार्यक्रममा नेपाल विद्युत प्राधिकरण नेपालगञ्ज वितरण केन्द्रका नो लाइट इन्चार्ज हिरामणि घर्ती मगरले विद्युतीय आगलागी सम्बन्धि दुर्घटना न्यूनीकरण कसरी गर्ने भन्ने विषयमा प्रस्तुतिकरण गरेका थिए । युनिसेफका प्राविधिक अधिकृत नरेश निदालले अपांगतामैत्री संरचना निर्माणदेखि विपदका बेला अपांगता भएका व्यक्तिहरुलाई जोगाउन पर्ने अपनाइनुपर्ने पूर्व सावधानीका विषयमा सहजीकरण गरेका थिए । अपांगता भएका व्यक्तिहरुको ज्यान उच्च जोखिममा हुने भएकाले स्वयम् पनि विशेष सावधानी र सतर्कता अपनाउनुपर्ने निदालले बताए ।

यस्तै रेडक्रसका प्रल्हाद विश्वकर्माले आगलागीबाट बच्न के कस्ता उपाय अबलम्बन गर्ने भन्ने विषयमा प्रस्तुतिकरण गरेको सुपर प्रोजेक्टका प्राविधिक अधिकृत शिव सुवेदीले बताए । त्यसक्रममा नेपालगञ्ज उपमहानगरपालिकाका दमकल सेवाका कर्मचारीहरुले घरेलु आगलागीवाट बच्ने उपायबारे प्रदर्शनी गरी जानकारी समेत गराएका थिए । सुपर परियोजना नेपालगञ्ज उपमहानगरपालिकाको वडा नम्बर ३ र ७ मा सञ्चालित छ ।

प्रकाशित मिति: शुक्रबार, जेठ २६, २०८० २०:२३