३७ जिल्लाबाट ५२ जनप्रतिनिधि निर्वाचित गर्न शुरु भयो उपनिर्वाचन

उपनिर्वाचन -२०७६

गृहपृष्ठ
उपनिर्वाचन -२०७६
३७ जिल्लाबाट ५२ जनप्रतिनिधि निर्वाचित गर्न शुरु भयो उपनिर्वाचन

३७ जिल्लाबाट ५२ जनप्रतिनिधि निर्वाचित गर्न शुरु भयो उपनिर्वाचन

शनिबार, मंसिर १४, २०७६ बागेश्वरी पोस्ट

नेपालगन्ज । संघ, प्रदेश र स्थानीय गरी तीन तहबाट ५२ जनप्रतिनिधि निर्वाचित गर्न मतदान प्रक्रिया सुरु भएको छ । शनिबारका लागि तय भएको उपनिर्वाचनमा ३७ जिल्लाका दुई सय ४७ मतदानस्थलमा मतदानका लागि पाँच सय ३७ केन्द्र राखिएका छन् ।

बिहान ७ बजेबाट सुरु भएको मतदान प्रक्रिया साँझ ५ बजेसम्म चल्नेछ । बिहीबार र शुक्रबार सबै मतदानस्थलबाट मतदाता परिचयपत्र वितरण गरेको निर्वाचन आयोगले मतदाता परिचयपत्र नभए पनि नागरिकता, सवारीचालक अनुमतिपत्र, राहदानी वा राष्ट्रिय परिचयपत्रका आधारमा पनि मतदान गर्न पाउने व्यवस्था गरेको जनाएको छ ।

मतदाता परिचयपत्र लिन छुटेका र साथमा नरहेकाहरू मताधिकारबाट वञ्चित नहुन् भनेर अन्य परिचयलाई पनि आधिकारिकता दिइएको आयोगले स्पष्ट पारेको छ । मतदाता नामावली वा परिचयपत्रमा सामान्य त्रुटि भएमा त्यसलाई ‘सानोतिनो भुलचुक’ मानेर मतदानमा सहभागी गराउनसमेत आयोगले मतदान अधिकृतहरुलाई निर्देश गरेको छ ।

यसअघि ०७४ मा भएका स्थानीय तह, प्रतिनिधिसभा र प्रदेशसभा निर्वाचनमा विजयी ५२ जनप्रतिनिधिको मृत्यु, राजीनामा, कारबाही वा अन्य कारणले पद रिक्त भएकाले पदपूर्तिका लागि उपनिर्वाचन हुन लागेको हो । यो उपनिर्वाचन हुने क्षेत्रमा चार लाख ५४ हजार एक सय १४ मतदाता रहेको निर्वाचन आयोगले जनाएको छ ।

प्रकाशित मिति: शनिबार, मंसिर १४, २०७६ ०७:१२