रविन स्वप्नील गिरीको दोस्रो गीत बजारमा

मनोरञ्जन

गृहपृष्ठ
मनोरञ्जन
रविन स्वप्नील गिरीको दोस्रो गीत बजारमा

रविन स्वप्नील गिरीको दोस्रो गीत बजारमा

मंगलबार, जेठ ६, २०७७ बागेश्वरी पोस्ट

नेपालगन्ज । गायक तथा गीतकार रविन स्वप्नील गिरीको नयाँ गीत सार्वजनिक भएको छ ।

‘अन्तिम पल्ट’ बोलको उक्त गीतमा गिरीकै स्वर र शब्द छ । संगीत भने दिपकराज विश्वकर्माले दिएका छन् । नेपाली सांगितिक फाँटमा गायक र गीतकारका रुपमा उदाउँदै गरेका पेशाले कृषि अनुसन्धान अधिकृत गिरी गजल लेखन र वाचनका लागि पनि अब्बल मानिन्छन् ।

यसअघि पनि उनकै स्वर र शब्द तथा विश्वकर्माकै संगीत रहेको ‘जिन्दगीको के छ भर’ बोलको गीत बजारमा आइसकेको छ । सानैदेखिको गायन र साहित्यप्रतिको आफ्नो लगाबलाई गिरीले विस्तारै मूर्तरुप दिन लय समाएका छन् ।

‘सानैदेखि गीत गाउने, साहित्य रचना गर्ने मेरी रुची हो, पढाई र जागिरका अलाबा फुर्सदको समयमा अहिले पनि गीत, कविता, गजल लेखिरहेको हुन्छु,’ गिरी भन्छन्–‘गायन र साहित्य सिर्जना मेरो अन्तस्करणको भावना हो जसलाई म मनभित्र नगुम्स्याई निरन्तर पोख्न चाहन्छु ।’

अघिल्लो गीतपछि स्रोता, साथीभाई र अग्रज अनुजबाट आएको प्रतिक्रिया एवम् हौसलाले आफूलाई गीत संगीत र साहित्य सिर्जनाको पाटोमा निरन्तर लागिरहन प्रेरणा दिएको बताउने गिरीका शब्द रहेका अन्य केही गीत पनि बजारमा आउने तयारीमा छन् ।

चर्चित गायक शिव परियारको स्वरमा पनि उनको शब्द शिल्पी निकट समयमै पोखिँदैछ ।