एसीसी प्रिमियर कप: नेपालले कतारलाई दियो १५८ रनको लक्ष

खेलकुद

गृहपृष्ठ
खेलकुद
एसीसी प्रिमियर कप: नेपालले कतारलाई दियो १५८ रनको लक्ष

एसीसी प्रिमियर कप: नेपालले कतारलाई दियो १५८ रनको लक्ष

बिहीबार, वैशाख १४, २०८० बागेश्वरी पोस्ट

नेपालगन्ज । काठमाडौंमा जारी एसीसी प्रिमियर कप क्रिकेटको समूह 'ए' अन्तिम खेलमा नेपालले कतारलाई १५८ रनको लक्ष्य दिएको छ ।

एसीसी प्रिमियर कप क्रिकेटको समूह चरणको अन्तिम खेलमा नेपालले कतारसँग खेलिरहेको छ । कीर्तिपुर मैदानमा नेपालले टस हारेर पहिले ब्याटिङ गर्दै लज्जास्पद प्रदर्शन गरेको छ । नेपालले ४०.३ ओभरमा सबै विकेट गुमाएर १५७ रन मात्र बनाउन सक्यो ।

१११ रन जोड्दा ९ विकेट गुमाइसकेको नेपालका लागि स्पिन बलर सन्दीप लामिछानेले सर्वाधिक ४२ रन बनाए । उनले ५८ बलमा ६ चौकाको मद्धतले उक्त योगफल बनाएका हुन् ।

सन्दीपको यो एक दिवसीय क्रिकेटको सबैभन्दा ठूलो योगफल हो । दशौं विकेटका लागि सबैभन्दा ठूलो साझेदारी भएको थियो । सन्दीप र ललितनारायण राजवंशीबीच ४६ रनको साझेदारी भएको थियो । ललितले १७ बलको सामना गर्दै मात्र १ रन बनाएका थिए ।

कप्तान रोहित पौडेलले २७ तथा आसिफ शेखले १९ रन बनाए । अमिर फारुकले ४ तथा ओवाइस अहमदले ३ विकेट लिए ।

यो खेलको जित हारले नेपाललाई खासै फरक पर्दैन । तर, नेपालले यही खेलमा कीर्तिमान बनाउन सक्ने थियो । समूहको कमजोर टिमविरुद्ध उच्च योगफल बनाउन सक्थ्यो ।

तर, नेपालले त जारी प्रतियोगितामै सबैभन्दा कमजोर ब्याटिङ गर्यो । कीर्तिपुर मैदानमा यही प्रतियोगिताको समूह चरणको खेलमा यूएईले सिंगापुरमाथि कीर्तिमानी रन बनाएको थियो । यूएईले एकै इनिङ्समा ४७१ रन बनाएको थियो । र, सिंगापुरले पनि २७० रन बनाएको थियो ।

समग्रमा एकै दिन एकै खेलमा ७४१ रन बनेको थियो । नेपालले घरेलु मैदानमा घरेलु दर्शकलाई भरपूर मनोरञ्जन दिलाउने क्रममा रेकर्ड बनाउने अवसर छ । आजको मौसम पनि राम्रो भएकाले गर्दा नेपाललाई त्यो अवसर छ ।

नेपालका हरेक युवा खेलाडीको ब्याट चल्छ । यदि पहिले ब्याटिङ गर्ने अवसर पाउने हो भने नेपालले उच्च योगफल बनाउन सक्छ । कतार समूह ए को सबैभन्दा कमजोर टिम हो । कतारले एक अंक पनि जोडेको छैन ।

समूह ए बाट सेमिफाइनल पुग्ने दुई टोलीको टुंगो लागिसकेको अवस्थामा यो खेलपछि समूहको विजेता र उपविजेताको टुंगो लाग्नेछ ।

नेपाल ३ खेलमा २ मा जित र १ खेलमा अंक बाँड्दै ५ अंकका साथ एक खेल अगाबै सेमिफाइनलमा पुगेको थियो । ओमान ४ खेलमा ३ मा जित र १ मा हारसहित ६ अंकका साथ सेमिफाइनलमा स्थान बनाएको थियो ।

नेपाललाई समूह विजेता बन्न कतारलाई जित्नुपर्छ । कमजोर कतारसँग अप्रत्याशित हार बेहोरे पनि नेपाललाई यो प्रतियोगिताले फरक पर्दैन ।

नेपाल विजयी हुँदा ७ अंकका साथ समूह विजेताको रुपमा सेमिफाइनलमा स्थान बनाउनेछ । वर्षा वा कुनै कारण खेलमा अंक बाँडेमा पनि नेपाल समूह विजेता बन्नेछ । अंक बाँड्दा नेपाल र ओमान दुवैको समान ६ अंक हुनेछ ।

नेपाल रनरेटमा अघि रहेर समूह विजेता बन्नेछ ।

१० राष्ट्र सहभागी प्रतियोगितामा पाँच/पाँच राष्ट्रको दुई समूह रहेको छ । हरेक समहका दुई राष्ट्रले शनिबार हुने सेमिफाइनल खेल्नेछन् ।

आजको अर्को खेलमा हङकङ र कुवेत भिडिरहेका छन् । कुवेतले टस हारेर पहिले ब्याटिङ गरिरहेको छ । कुवेतले पनि शुरुआतमै विकेट गुमाएको छ ।

यो खेलको विजेता सेमिफाइनलमा पुग्नेछ । ६ अंकका साथ यूएई सेमिफाइनलमा पुगिसकेको छ । ५ अंकको हङकङ र ४ अंकको कुवेतको विजेता सेमिफाइनलमा पुग्ने भएको हो ।

आगामी सोमबार फाइनल हुनेछ । उपाधि विजेता टोली एसिया कपमा खेल्न पाउनेछ । एसिया कपमा यो विजेता टोली भारत र पाकिस्तानको समूहमा रहेर खेल्नेछ । एसिया कप आगामी सेप्टेम्बरमा आयोजना हुनेछ ।

यस्तै शीर्ष तीनमा रहने टोली एसीसी इमर्जिङ कपका लागि छनोट हुनेछन् ।

प्रकाशित मिति: बिहीबार, वैशाख १४, २०८० १२:३०