२३९ फर्जी नाम थपिएपछि बाँके कांग्रेस कार्यालयमा तालाबन्दी

राजनीति

गृहपृष्ठ
राजनीति
२३९ फर्जी नाम थपिएपछि बाँके कांग्रेस कार्यालयमा तालाबन्दी

२३९ फर्जी नाम थपिएपछि बाँके कांग्रेस कार्यालयमा तालाबन्दी

अनिश्चिततातर्फ धकेलियो अधिवेशन

बुधबार, कात्तिक २४, २०७८ बागेश्वरी पोस्ट

नेपालगन्ज । बाँकेमा कांग्रेसको क्रियाशील सदस्यतामा चरम बदमासी गरिएपछि पार्टी कार्यालयमा तालाबन्दी गरिएको छ । यसअघि पार्टीको वेबसाइटमा प्रकाशित अन्तिम नामावली बाहेकका २३९ जनाको फर्जी नाम थपेर जिल्लाको निर्वाचन समितिलाई पठाउन थालेको लिस्ट बाहिरिएपछि निर्वाचन कार्यक्रम रोक्न माग गर्दै तालाबन्दी गरिएको बाँके कांग्रेसका युवा नेता पोषण केसीले बताए ।

"डडेलधुराको नियति बाँकेमा पनि दोहोर्याउने कुचेष्टा गरियो, प्रकिया पुगेर फाइनल भइसकेको नामावलीलाई लत्याएर २३९ जना फर्जी नाम पठाएको लिष्ट नै हामीले प्राप्त गरेका छौं," उनले भने-"यस्तो निर्वाचन हामी हुन दिन्नौं ।"
निर्वाचन समितिको हातमा ती नाम प्राप्त हुनुअघि नै कांग्रेस नेताहरुले निष्पक्ष अधिवेशन हुन नसक्ने भन्दै तालाबन्दी गरेका हुन् । नेताहरु तप्त पौडेल, ज्ञानु केसी, हुर्मत न्यौपाने, नारायण गौडेल, पोषण केसी, डिल्ली गिरी, पूर्ण आचार्य लगायतले तालाबन्दी गरेका थिए । उनीहरुले पार्टी कार्यालयमा रहेको निर्वाचन सचिवालयमा तालाबन्दी गर्न खोजेपछि निर्वाचन समितिको टोली बाहिरिएको सहायक निर्वाचन अधिकृत चित्र बहादुर शाहीले बताए । "हामीलाई उहाँहरुले भनेको नाम त आएको छैन तर उहाँहरुले नाम आउँदैछ भनेर तालाबन्दी गर्न खोजेपछि हामी निस्कियौं," शाहीले भने ।

२३९ मध्ये अधिकांश क्षेत्र नम्बर १ का छन् । कोहलपुर, राप्तीसोनारी र नरैनापुरका धेरै छन् । केही खजुरा र बैजनाथका पनि छन् । "क्षेत्रीय सभापति माधवराम खत्रीले अधिवेशनमा एकलौटी गर्न सुरुदेखि नै गरेका बदमासीका शृङ्खलाहरुको यो पराकाष्ठा हो," केसीले भने-"पार्टी कब्जा गर्ने बदनियत उदांगो भयो ।" यो घटनासंगै बाँकेको अधिवेशन फेरि अनिश्चिततातर्फ धकेलिएको छ । यसैवीच ३२ जना नेताले प्रमुख जिल्ला निर्वाचन अधिकृतलाई सम्बोधन गर्दै विज्ञप्ती जारी गरेर तालाबन्दी गर्नुको कारण प्रष्ट्याएका छन् । क्षेत्रीय सभापति खत्री र जिल्ला उपसभापति फूलाराम थारुले अधिवेशन भाँँड्ने गरी हर्कत गरेकाले आफूहरुले बाध्य भएर तालाबन्दी गरेको उल्लेख गरेका छन् । छुटेको भनेर समावेश गर्न खोजिएको फर्जी नाम खारेज नभएसम्म अधिवेशन हुन नसक्ने उनीहरुको भनाई छ ।