गणेशमान सिंहको स्मृति दिवसमा कांग्रेस बाँकेले दीप प्रज्ज्वलन गर्दै

राजनीति

गृहपृष्ठ
राजनीति
गणेशमान सिंहको स्मृति दिवसमा कांग्रेस बाँकेले दीप प्रज्ज्वलन गर्दै

गणेशमान सिंहको स्मृति दिवसमा कांग्रेस बाँकेले दीप प्रज्ज्वलन गर्दै

आइतबार, असोज २, २०७९ बागेश्वरी पोस्ट

नेपालगञ्ज । आज गणेशमान सिंहको २५औँ स्मृति दिवस मनाइँदैछ । उनको शालिकमा माल्यार्पण एवम् पुष्पगुच्छा अर्पण गरेर नेपाली कांग्रेसले स्मृति दिवस मनाइरहेको छ । नेपाली कांग्रेस बाँकेले आज अपरान्ह ४ बजे गणेशमान चोकमा एक कार्यक्रमको आयोजना गरेको छ । गणेशमान चोकमा दीप प्रज्ज्वलनको कार्यक्रम राखिएको कोषाध्यक्ष यज्ञबहादुर बस्नेतले बताए । उनले कार्यक्रममा उपस्थित हुन सबैलाई आग्रह गरेका छन् ।

प्रजातन्त्र पुनःस्थापनाका लागि २०४६ सालमा भएको जनआन्दोलनमा गरेको नेतृत्वका कारण उनलाई सर्वोच्च कमाण्डर मान्ने गरिन्छ । २०४६ को जनआन्दोलन सफल भएपछि तत्कालीन राजा वीरेन्द्रले प्रधानमन्त्री बन्न गरेको आग्रहमा उनले आफ्ना समकक्षी नेता कृष्णप्रसाद भट्टराईलाई अघि सार्दै नेपाली राजनीतिमा त्यागको उच्च नमुना प्रस्तुत गरेका थिए । १९७२ साल कात्तिक २४ गते काठमाण्डौको क्षेत्रपाटीमा जन्मिएका नेता सिंहको निधन २०५४ साल असोज २ गते भएको थियो ।

सिंहले १९९७ सालमा स्थापना भएको नेपालको पहिलो राजनीतिक पार्टी प्रजा परिषद्को सदस्य भई राणा शासन हटाउने अभियानमा आफूलाई सक्रिय बनाएका थिए । २०१५ सालमा पहिलो चुनावपछि बनेको सरकारमा मन्त्री भएका गणेशमानले २०१७ सालमा प्रजातन्त्र अपहरण भएपछि आठ वर्ष निरन्तर पहिले सिंहदरबार र त्यसपछि सुन्दरीजल गृहमा कारावास जीवन बिताएका थिए ।

२०२५ सालमा वीपीसँगै सुन्दरीजल बन्दी गृहबाट रिहा भएपछि प्रवासमा राजनीतिक सङ्गठन विस्तार गरे । २०३३ सालमा वीपीसँगै राष्ट्रिय एकता तथा मेलमिलापको नीति लिएर स्वदेश फर्केर तत्कालीन पञ्चायती व्यवस्थाका विरूद्ध सक्रिय रहे । ।

प्रकाशित मिति: आइतबार, असोज २, २०७९ १३:०५

प्रतिक्रिया दिनुहोस्