कतार विश्वकप: क्रोएसियालाई तेस्रो स्थानको उपाधि

खेलकुद

गृहपृष्ठ
खेलकुद
कतार विश्वकप: क्रोएसियालाई तेस्रो स्थानको उपाधि

कतार विश्वकप: क्रोएसियालाई तेस्रो स्थानको उपाधि

आइतबार, पुस ३, २०७९ बागेश्वरी पोस्ट

नेपालगन्ज । कतार विश्वकप २०२२ को तेस्रो स्थानको उपाधि क्रोएसियाले जितेको छ । अफ्रिकाबाट विश्वकपमा सहभागी भएको ऐतिहासिक टिम मोरक्कोलाई गए राती भएको प्लेअफमा क्रोएसियाले २-१ गोलले हराउँदै तेस्रो स्थानको उपाधि जितेको हो ।

प्लेअफ खेलको ७ औं मिनेटमै क्रोएसियाका जोस्को भार्डिओलको डाइभिङ हेडर गोलमार्फत क्रोएसियाले १-० को अग्रता बनाएको थियो । तर, मोरक्कोका अचरफ दारीले २ मिनेटभित्रै क्लोज रेन्जबाट गोल गरी खेल बराबरीमा ल्याएका थिए ।

पुनः क्रोएसियाका मिस्लाभ ओर्सिचले पहिलो हाफको ४२ औं मिनेटमा शानदार गोल गरी क्रोएसियालाई पुनः २-१ को अग्रता दिलाएका थिए । दोस्रो हाफमा मोरक्कोले बराबरी खेल्ने थुप्रै अवसर गुमाउँदै क्रोएसियासँग पराजित हुन पुगेको थियो ।

क्रोएसिया गत विश्वकपमा फ्रान्ससँग फाइनलमा पराजित रहेको थियो भने सन् १९९८ मा विश्वकपमा डेब्यू गरेर एकपल्ट फेरि विश्वकपमा तेस्रो हुँदै क्रोएसियाले विश्व फुटबलमा एलिट देशका रुपमा आफूलाई स्थापित गरेको छ । क्रोएसियाले क्वाटरफाइनलमा विश्वकपको सबैभन्दा दाबेदार टिम ब्राजिललाई पराजित गर्दै सेमिफाइनलको यात्रा तय गरेपनि सेमिफाइनलमा अर्जेन्टिनाले क्रोएसियालाई ३-० गोलले पराजित गर्दै उसको माथिल्लो यात्रालाई पुर्णविराम लगाएको थियो ।

आज राती विश्वकपको फाइनल केल हुँदैछ । फाइनलमा अर्जेन्टिना र फ्रान्स खेल्दैछन् । दुवै राष्ट्रले २-२ पटक विश्वकप जितिसकेका छन् ।

प्रकाशित मिति: आइतबार, पुस ३, २०७९ ०७:२६