सर्वोच्चले सांसद पद जोगाइदिएका फणीन्द्र बने दोस्रो पटक उर्जामन्त्री

राजनीति

गृहपृष्ठ
राजनीति
सर्वोच्चले सांसद पद जोगाइदिएका फणीन्द्र बने दोस्रो पटक उर्जामन्त्री

सर्वोच्चले सांसद पद जोगाइदिएका फणीन्द्र बने दोस्रो पटक उर्जामन्त्री

आइतबार, असार १६, २०८१ बागेश्वरी पोस्ट

पोखरा । सर्वोच्च अदालतको आदेशमा गण्डकी प्रदेशका सांसद फणिन्द्र देवकोटा दोस्रो पटक मन्त्री पदको शपथ लिएका छन् । सर्वोच्च अदालतले सांसद पद थमौती गरिदिएपछि नेपाल समाजवादी पार्टी (नेसपा) का सांसद देवकोटा फेरि दोस्रो पटक उर्जामन्त्री बन्न पाएका हुन् ।

उनलाई आज बिहान प्रदेश प्रमुख डिल्लीराज भट्टले पद तथा गोपनीयताको शपथ खुवाए । गत जेठ २८ गते उनले मुख्यमन्त्री सुरेन्द्रराज पाण्डेलाई विश्वासको मत दिएका थिए । त्यसको भोलिपल्ट देवकोटालाई ऊर्जा, जलस्रोत तथा खानेपानीमन्त्रीमा नियुक्त गरिएको थियो ।

नेसपाको सांसद भए पनि उनको संसदीय दल नेकपा माओवादी केन्द्र हो । किनकि उनले चुनावमा माओवादीकै चिन्ह लिएर चुनाव जितेका थिए । पटक पटक उनले माओवादीबाट आफू अलग हुन पाउनुपर्ने माग गर्दै आएका थिए । नेसपाका अध्यक्ष डा. बाबुराम भट्टराईले समेत उक्त माग गर्दै आएका थिए ।

उनले पाण्डेलाई विश्वासको मत दिएपछि माओवादीले कारबाही गरेको थियो । मन्त्री बनेको चार दिनमै जेठ ३२ गते उनले सांसद पद गुमाएका थिए ।

माओवादीको कारबाहीपछि देवकोटा सर्वोच्च पुगेका थिए । असार १० गते सर्वोच्चले उनको सांसद पद रिक्त गर्ने सभामुखको निर्णय तत्काल कार्यान्वयन नगर्न अन्तरिम आदेश दियो ।

सर्वोच्चको आदेशसँगै पद फिर्ता पाएका देवकोटालाई मुख्यमन्त्री पाण्डेले फेरि सोही मन्त्रालयको जिम्मेवारी दिएका हुन् । उनलाई संसदमा जान समेत माओवादीले अवरोध गरेको थियो ।

प्रकाशित मिति: आइतबार, असार १६, २०८१ १२:४४

प्रतिक्रिया दिनुहोस्