एचआइभी एड्सबारे नेपालगञ्जका जनप्रतिनिधिसंग जुनकिरी आमा समूहको अन्तरक्रिया

स्वास्थ्य

गृहपृष्ठ
स्वास्थ्य
एचआइभी एड्सबारे नेपालगञ्जका जनप्रतिनिधिसंग जुनकिरी आमा समूहको अन्तरक्रिया

एचआइभी एड्सबारे नेपालगञ्जका जनप्रतिनिधिसंग जुनकिरी आमा समूहको अन्तरक्रिया

शुक्रबार, कात्तिक ९, २०८१ बागेश्वरी पोस्ट

नेपालगन्ज । भेरी अस्पतालमा रहेको एआरटी युनिटबाट ५८८ जना एचआइभी संक्रमितले नियमित औषधि सेवन गरिरहेका छन् । ती मध्ये २९१ पुरुष, २५८ महिला, १५ जना बालक, १४ जना बालिका र १० जना अन्य छन् । त्यसमा नेपालगन्ज उपमहानगरपालिकाका सबैभन्दा बढी ११४ जना छन् भने सबैभन्दा कम जानकीमा १९ जना रहेको एआरटी काउन्सेलर इन्द्र सैनीले बताए । यस्तै कोहलपुरमा ८३, खजुरा ५४, बैजनाथ ४२, नरैनापुर ४१, डुडुवा ३७ र राप्तीसोनारीका ३५ जना छन् । नेपालगन्ज उपमहानगरपालिकामा पनि सबैभन्दा बढी वडा नम्बर ४ मा छन् । एआरटी युनिटका अनुसार हालसम्म १७ सय जनालाई एआरटी सेवा दिइएको छ ।

सन् २००४ मा स्थापना भएको एआरटी युनिटले अहिलेसम्म १९ सय जनाको रोग पहिचान गरेको छ भने २ लाख जनाको एचआइभी परीक्षण गरिएको छ । भेरी अस्पतालका एचआइभी फोकल पर्सन वरिष्ठ फिजिसियन डा. संकेत कुमार रिसालले एआरटी सेवा प्रभावकारी देखिएको बताए । डा. रिसालका अनुसार एआरटी सेवा लिइरहेका एचआइभी संक्रमित आमाबुवाबाट जन्मेका सन्तानमा 'पोजिटिभ' देखिएको छैन । उनले एचआइभी एड्सलाई पनि अन्य रोग सरह नै मानेर चेकजाँच गराउन सचेतना बढाउन आवश्यक रहेकोमा जोड दिए ।

May be an image of 3 people and text

जुनकिरी महिला समूहले आज नेपालगन्जमा उपमहानगरपालिकाका जनप्रतिनिधिसंग आयोजना गरेको वैठकमा बोल्दै उपप्रमुख कमरुद्दिन राईले एचआइभी पहिचान, उपचार प्रक्रिया र उपचारमा आमनागरिकको पहुँच वृद्धिका लागि सबैको हातेमालो, सहयोग र सहकार्य आवश्यक रहेको बताए । उनले नेपालगन्ज उपमहानगरपालिका यसमा गम्भीर र संवेदनशील रहेको उल्लेख गरे । स्वास्थ्य महाशाखा प्रमुख राम बहादुर चन्दले नेपालगन्ज उपमहानगरपालिकाले पनि एचआइभी संक्रमित बालबालिकालाई मासिक ५ हजार रुपैयाँ अनुदान उपलब्ध गराइरहेको बताए ।

May be an image of 13 people, lighting and table

वैठकमा जुनकिरी आमा समूहका कार्यक्रम संयोजक रविन्द्र सिंह राठौरले संस्थागत परिचय तथा संस्थाद्वारा संचालित कार्यक्रम, एचआइभी सम्बन्धि सेवा सुविधा, उपचार हेरचाह तथा स्याहारका बारेमा जानकारी गराएका थिए । जुनकिरीले सामुदायिक स्याहार केन्द्रमार्फत २४० जनालाई सेवा दिइरहेको राठौरले बताउनुभयो । ती मध्ये १२४ पुरुष, ११२ महिला र ३ जना तेस्रो लिंगी छन् । यसमा बाँकेका ९४, बर्दियाका ४८ र अरु अन्य जिल्लाका हुन् । जुनकिरीले घर भेट कार्यक्रम पनि गर्दै आएको छ । यस्तै ९१७ जनाको एचआइभी जाँच गर्दा ६ जनामा 'पोजिटिभ' देखिएको छ ।

कार्यक्रम संयोजक राठौरले एचआइभी संक्रमित बालबालिकाहरुको लागि सामाजिक संरक्षण अनुदान पनि उपलब्ध गराइरहेको जानकारी दिए । मासिक १ हजार रुपैयाँ पाउने गरी मासिक ३४ जनालाई नियमित अनुदान उपलब्ध गराइएको छ । त्यसमा बाँकेका १९ जना छन् । राठौरले एड्स प्रभावितलाई हेर्ने नजर अझै नबदलिएको भन्दै हेला गर्ने प्रवृत्ति कायमै रहेको अनुभव सुनाए । यसमा समाजको दृष्टिकोण बदल्नुपर्नेमा उनको जोड छ ।

May be an image of 10 people, table and text