बालिका शिक्षा कार्यक्रमको सिकाई आदानप्रदान तथा योजना बैठक सम्पन्न

समाचार

गृहपृष्ठ
समाचार
बालिका शिक्षा कार्यक्रमको सिकाई आदानप्रदान तथा योजना बैठक सम्पन्न

बालिका शिक्षा कार्यक्रमको सिकाई आदानप्रदान तथा योजना बैठक सम्पन्न

सोमबार, चैत ११, २०८१ बागेश्वरी पोस्ट

नेपालगञ्ज । बालिका शिक्षा कार्यक्रमको सिकाई आदानप्रदान तथा आगामी योजना बैठक बैजनाथको प्रभात नमुना माविमा सम्पन्न भएको छ । रुम टु रिडको आर्थिक तथा प्राविधिक सहयोगमा बास नेपालद्वारा सञ्चालित उक्त कार्यक्रम अन्तरगत हालसम्मका कार्यक्रमका उपलब्धिहरू, राम्रा अभ्यासको बारेमा जानकारी आदानप्रदान तथा छलफल गर्ने, जलवायु कार्यमा भएका सिर्जनात्मक कार्यहरुको निरन्तरताको प्रतिबद्धता लिने र सरोकारवालाहरुसंग कार्यक्रमको समिक्षा गरी आगामी दिनमा निरन्तरताको योजना तर्जुमा गर्ने उद्दृेश्यले उक्त बैठक गरिएको हो ।

बैठकमा जलवायु कार्यक्रममार्फत सञ्चालन भएका सत्रहरु, हालसम्म सञ्चालन गरिएका कार्यक्रमबारे जानकारी तथा मुख्य उपलब्धिहरुको बारेमा प्रस्तुतिकरण बास नेपालका सिनियर सामाजिक परिचालक मेघा रानाले गरेकी थिइन् । बैठकमा बोल्दै बिद्यालय ब्यवस्थापन समिति अध्यक्ष दल बहादुर सुनारले निकै उपलब्धिपूर्ण रहेको कार्यक्रमको निरन्तरताका बिषयमा हालसम्म कुनै पनि जानकारी नभएकोमा दुःख लागेको बताए । उनले विद्यालय, बिद्यार्थी तथा समुदायमा सकारात्मक प्रभाव पारेको कार्यक्रमलाई निरन्तरता दिन सबै लाग्नुपर्नेमा जोड दिए ।

बैठकमा बोल्दै विद्यालयका प्रधानाध्यापक बाबुराम अधिकारीले जलवायु परिवर्तन कार्यक्रमले बिद्यालयमा धेरै परिवर्तन ल्याएको बताउँदै उक्त कार्यक्रमलाई विद्यालयले निरन्तरता दिने प्रतिबद्धता ब्यक्त गरे । सो क्रममा वडा अध्यक्ष देब बहादुर रावत, शिक्षक अभिभावक संघका अध्यक्ष दिप बहादुर थापा, सम्पर्क शिक्षक धनमाया बिकले कार्यक्रमको प्रभावकारिताका बिषयमा बोलेका थिए ।

यसैगरी बैठकको क्रममा जलवायु न्याय क्लबका बालिकाहरु चेतना बुढा, पुष्पा बिक, रितु बिक, सरस्वती थापा, पूर्णिमा सिंह ठकुरी, आरती परियार, कोमल हमाल लगायतले जलवायु न्याय क्लबमा रहँदा बालिका शिक्षा कार्यक्रमका सहभागीहरूको सिकाई र प्रतिबद्धता ब्यक्त गरेका थिए ।

प्रकाशित मिति: सोमबार, चैत ११, २०८१ १९:३९

प्रतिक्रिया दिनुहोस्