प्रचण्डले गरे राप्ती नदी कटान क्षेत्रको निरीक्षण

समाचार

गृहपृष्ठ
समाचार
प्रचण्डले गरे राप्ती नदी कटान क्षेत्रको निरीक्षण

प्रचण्डले गरे राप्ती नदी कटान क्षेत्रको निरीक्षण

आइतबार, वैशाख १४, २०८२ बागेश्वरी पोस्ट

नेपालगञ्ज । नेकपा माओवादी केन्द्रका अध्यक्ष एवम् पूर्व प्रधानमन्त्री पुष्पकमल दाहाल प्रचण्डले बाँकेस्थित राप्ती नदीले कटान गरेको क्षेत्रको निरीक्षण गरेका छन् । पार्टीले सञ्चालन गरेको तराई मधेश जागरण अभियान अन्तर्गत बाँकेको फत्तेपुरमा आयोजना गरिएको जनसभालाई सम्बोधन गर्न जाने क्रममा प्रचण्डले आज नदी कटान क्षेत्रको अवलोकन गरेका हुन् ।

उक्त क्षेत्रमा तटबन्ध निर्माण नहुँदा राप्ती नदीमा आउने बाढीबाट राप्तीसोनारी गाउँपालिका वडा नम्बर ६ र ७ तथा नरैनापुरको वडा नम्बर ५ र ६ का तटीय क्षेत्रका बस्तीहरु प्रभावित हुँदै आएका छन् । ती स्थानमा अहिले संघीय सरकारबाट विनियोजित बजेटमार्फत काम सुरु भइसकेको छ । त्यसक्रममा अध्यक्ष प्रचण्डले तत्काल हुन सक्ने क्षतिको न्यूनीकरणका लागि उपलब्ध बजेटबाट काम अघि बढाउन आयोजना प्रमुखलाई निर्देशन दिएका छन् । साथै उनले थप बजेटका लागि पहल गर्ने प्रतिबद्धता पनि व्यक्त गरेका छन् ।

पूर्व मन्त्री एवम् माओवादी स्थायी समितिका सदस्य महेश्वर गहतराज अथक, पूर्व उपसभामुख पूर्णा कुमारी सुवेदी, पूर्व लुम्बिनी प्रदेश मन्त्री कृष्ण केसी नमुना र वडा नम्बर ७ का वडाध्यक्ष रामलखन थारूले राप्ती नदीले गर्दै आएको कटान, डुबान र तटबन्ध निर्माणमा भइरहेको ढिलाईबारे अध्यक्ष प्रचण्डलाई जानकारी गराएका थिए ।

प्रकाशित मिति: आइतबार, वैशाख १४, २०८२ १९:२४

प्रतिक्रिया दिनुहोस्