बाढी पूर्व कार्य प्रोटोकल पुनर्ताजगी तथा योजना तर्जुमा कार्यशाला सम्पन्न

समाचार

गृहपृष्ठ
समाचार
बाढी पूर्व कार्य प्रोटोकल पुनर्ताजगी तथा योजना तर्जुमा कार्यशाला सम्पन्न

बाढी पूर्व कार्य प्रोटोकल पुनर्ताजगी तथा योजना तर्जुमा कार्यशाला सम्पन्न

बुधबार, वैशाख १७, २०८२ बागेश्वरी पोस्ट

नेपालगन्ज । नेपाल रेडक्रस सोसाइटी केन्द्रीय कार्यालयको अयोजनामा नेपाल बाढी सामान्य पूर्व कार्य प्रोटोकल पुनर्ताजगी तथा योजना तर्जुमा कार्यशाला नेपालगंजमा सम्पन्न भएको छ । रेडक्रस तथा रेडक्रिसेन्ट सोसाइटीहरुको अन्तर्राष्ट्रिय महासंघको सहयोगमा बाँके, बर्दिया र कैलाली जिल्लाका ११ वटा पालिकाहरुमा उक्त गतिविधि संचालन हुनेछ ।

बाढी विपदको उच्च जोखिममा रहेका २२ वटा समुदायलाई लक्षित गरिएको छ । कार्यक्रमबाट १० हजार जना लाभान्वित हुने बताइएको छ । कार्यक्रममा नेपाल रेडक्रस सोसाइटी बाँके शाखाका कार्यबहाक सभापति शान्ति श्रेष्ठले बाढी विपदबाट प्रभावित हुने समुदायलाई हेरेर योजना निर्माण गर्ने र विपद पूर्व समुदायलाई सचेत गराउन अनुरोध गरिन् ।

नेपाल रेडक्रस सोसाइटी कैलाली जिल्ला शाखाका सभापति लोकराज जोशीले स्थानीय तहको नेतृत्वमा रेडक्रसले विपद व्यवस्थापनमा प्राविधिक सहयोग गर्नुका साथै स्वयंसेवक परिचालन गरी समुदायलाई सहयोग गर्दै आएको स्मरण गराए । कार्यक्रममा बाँके, बर्दिया र कैलाली जिल्लाको ११ वटा पालिकाका विपद फोकल पर्सन र नेपाल रेडक्रस सोसाइटीका प्रतिनिधिहरुको सहभागिता रहेको थियो ।

नेपाल रेडक्रस सोसाइटी बाँके शाखाका कार्यबाहक सभापति श्रेष्ठको अध्यक्षतामा सम्पन्न कार्यक्रममा स्वागत मन्तव्य बाँके शाखाका मन्त्री अजिज अहमद सिद्दिकी र उद्देश्यमाथि केन्द्रीय कार्यालय आपतकालीन कार्यसंचालन केन्द्रका संयोजक डम्बरबहादुर विष्टले प्रकाश पारेका थिए । अभिमुखीकरणको सहजीकरण नेपाल रेडक्रस सोसाइटी विपद व्यवस्थापन विभागका प्रमोद अधिकारीले गरेका थिए भने केन्द्रकै विवेक कायस्थले जलवायु परिवर्तन सम्बन्धि प्रस्तुतिकरण गरेका थिए ।

प्रकाशित मिति: बुधबार, वैशाख १७, २०८२ २२:२२