नेपालगञ्जका विद्यालयमा विपद् सुरक्षा योजना बनाइँदै

समाचार

गृहपृष्ठ
समाचार
नेपालगञ्जका विद्यालयमा विपद् सुरक्षा योजना बनाइँदै

नेपालगञ्जका विद्यालयमा विपद् सुरक्षा योजना बनाइँदै

शुक्रबार, जेठ २, २०८२ बागेश्वरी पोस्ट

नेपालगञ्ज । नेपालगञ्ज उपमहानगरपालिकाका विद्यालयहरुमा विपद् सुरक्षा योजना बनाइँदैछ । नेपालगञ्ज उपमहानगरपालिका शिक्षा महाशाखाले नगरका ३० वटा विद्यालय छनौट गरेर बृहत् विद्यालय सुरक्षा सम्बन्धि विपद् फोकल शिक्षकहरुको क्षमता विकास गरी विपद योजना तयार गर्ने नीति लिएको छ । जस अनुरुप फोकल शिक्षकहरुको दुई दिने क्षमता विकास प्रशिक्षण कार्यक्रम सुरु भएको छ । नेपालगञ्ज उपमहानगरपालिकामा सञ्चालित सहरी विपद् तथा भूकम्पीय पूर्व तयारी परियोजना (सुपर ।।) को प्राविधिक सहयोगमा कार्यक्रम गरिएको हो ।

तालिम उद्घाटन कार्यक्रममा बोल्दै नेपालगञ्ज उपमहानगरपालिका विपद् समिति संयोजक समिर प्रताप सिंहले विपदजन्य जोखिम न्यूनीकरणमा विद्यालयहरुलाई सबल र सक्षम बनाउन प्रशिक्षण कार्यक्रम सफल हुने विश्वास ब्यक्त गरे । शिक्षा महाशाखा प्रमुख गोर्ख बहादुर थापाले विपदमा विद्यालयले अपनाउनुपर्ने सुरक्षा रणनीतिबारे फोकल शिक्षकहरुले आर्जन गरेको ज्ञान र सीप विपद पूर्व तयारी, प्रतिकार्य र व्यवस्थापनमा उपयोगी हुने बताए । प्रशिक्षक एवम् भूकम्प प्रविधि राष्ट्रिय समाज नेपाल (एनसेट) का सुशिल पण्डितले भूकम्प लगायत अन्य विपदका घटनाहरुमा विद्यालयले ध्यान दिनुपर्ने र पूर्व तयारी गर्नुपर्ने विषयहरुमा केन्द्रित रहेर प्रशिक्षण कार्यक्रम सञ्चालन गरिने बताए ।

आपतकालीन कार्यसञ्चालन केन्द्रका सूचना व्यवस्थापन अधिृकत रुपन ज्ञवालीका अनुसार तालिमबाट फोकल शिक्षकहरुले भूकम्प, आगलागी लगायत विपद व्यवस्थापनबारे जानकारी हासिल गर्नेछन् । आफूले हासिल गरेको ज्ञान र सीपका आधारमा योजना बनाई शिक्षा महाशाखामा पेश गर्नेछन् । ज्ञवालीका अनुसार बृहत् विद्यालय सुरक्षा सम्बन्धि योजना तयार गर्ने तथा विद्यालयमा सचेतना प्रबद्र्धन गर्ने उद्देश्य प्रशिक्षण कार्यक्रमको छ । शिक्षा महाशाखाका शिक्षा अधिकृत डिल्ली आचार्यले पहिलो चरणमा फोकल शिक्षक र दोस्रो चरणमा विद्यालय व्यवस्थापन समिति र प्रधानाध्यापकहरुलाई पनि प्रशिक्षण दिइनेछ । सुपरका राजु अधिकारीले विद्यालय केन्द्रित विपद सुरक्षा योजना निर्माणमा प्राविधिक सहयोग गरेको बताए ।

प्रशिक्षण कार्यक्रममा एनसेटका सुशिल पण्डित, युनिसेफ नेपालका मिना मजाकोटी, कालिका स्वावलम्बन सामाजिक केन्द्रका गोपाल भण्डारीले सहजीकरण गरेका छन् ।

युरोपियन युनियनको सहयोगमा नेपालगञ्ज उपमहानगरपालिकामा सुपर सञ्चालनमा रहेको छ । युरोपियन युनियनको आर्थिक सहयोग तथा युएनडिपी, युनिसेफ, युएन ओमन र एचआईको साझेदारी एवम् सिडिएम नेपालको प्राविधिक सहयोगमा नेपालगञ्ज उपमहानगरपालिकामा सञ्चालित सुपर कार्यक्रमले विपद पूर्व तयारी र प्रतिकार्यका लागि काम गरिरहेको छ ।

प्रकाशित मिति: शुक्रबार, जेठ २, २०८२ १६:३१