अनलाइन टिभी पत्रकार संघ लुम्बिनीको अध्यक्षमा अधिकारी

समाचार

गृहपृष्ठ
समाचार
अनलाइन टिभी पत्रकार संघ लुम्बिनीको अध्यक्षमा अधिकारी

अनलाइन टिभी पत्रकार संघ लुम्बिनीको अध्यक्षमा अधिकारी

सोमबार, जेठ ५, २०८२ बागेश्वरी पोस्ट

नेपालगन्ज । अनलाइन टीभी पत्रकार संघ नेपाल लुम्बिनी प्रदेशको अध्यक्षमा कृष्णराज अधिकारी निर्विरोध निर्वाचित भएका छन् । अनलाइन टीभी पत्रकार संघ नेपाल लुम्बिनी प्रदेशको आज नेपालगन्जमा सम्पन्न प्रथम भेलाले अधिकारीको अध्यक्षतामा ११ सदस्यीय कार्यसमिति चयन गरको हो । जसको बरिष्ठ उपाध्यक्षमा दिपक न्यौपाने, उपाध्यक्षमा रञ्जित शाह, सचिवमा साबित्री गिरी, सहसचिवमा मन बहादुर सहकारी र कोषाध्यक्षमा भावना बुढा मल्ल निर्वाचित भएका छन् । यस्तै सदस्यहरुमा चन्द्रेश्वर त्रिपाठी, इरफान अली, कुशल बिक र स्वेता गिरी निर्वाचित भएका छन् । ११ जना कार्यसमिति मध्ये एक जनालाई नयाँ कार्यसमितिको बैठकले मनोनित गर्ने जनाएको छ ।

कार्यसमिति चयन अगाडि डिजिटल मिडियामा एआईको प्रयोग सम्बन्धि अभिमुखीकरण कार्यक्रम तथा अधिवेशन उद्घाटन गरिएको थियो । अनलाइन टिभी पत्रकार संघका केन्द्रीय प्रतिनिधि रोहित लिम्बूको अध्यक्षतामा भएको उद्घाटन कार्यक्रमका प्रमुख अतिथि नेपालगन्ज उपमहानगरपालिकाका प्रमुख प्रशान्त बिष्टले यो समय डिजिटल मिडियाको भएकाले अबको दिनमा डिजिटल मिडियामा कार्यरत पत्रकारहरुको क्षमता विकास लगायतका कार्यक्रमको लागि सहयोग गर्ने प्रतिबद्धता ब्यक्त गरे । साथै उनले अनलाइन टिभीमार्फत आउने बिषयबस्तुलाई थप प्रभावकारी बनाउन आवश्यक रहेको सुझाव दिए ।

कार्यक्रममा विशिष्ट अतिथि बाँकेका सहायक प्रमुख जिल्ला अधिकारी उमाकान्त अधिकारीले डिजिटल मिडियामा एआईको प्रयोग हुनु राम्रो कुरा भएता पनि पत्रकार सधैं सृजनशील बन्नुपर्ने सुझाव दिए । उनले समाजिक बिषयको उठान गरी विकासमा साझेदारी गर्न अनलाइन टिभीले राम्रो भूमिका निभाउन सक्ने बताए । यस्तै नेपाल पत्रकार महासंघ लुम्बिनी प्रदेशका अध्यक्ष शुक्रऋषि चौलागाईले लुम्बिनी प्रदेशले डिजिटल मिडियामा कार्यरत पत्रकारका लागि तालिम संचालन गरिरहेको र आगामी दिनमा पनि यस्ता कार्यक्रमलाई प्राथमिकता दिइने बताए । नेपाल पत्रकार महासंघ बाँकेका अध्यक्ष नवीन गिरीले आजको युग डिजिटल पत्रकारिताको युग भएकाले अनलाइन टिभी पत्रकार संघले गरिरहको कार्यलाई सबै पत्रकार माझ पुर्याएर पत्रकार आचारसंहिताबारे जानकारी दिन सुरु गरेको यो अभियानको प्रशंसा गरे । उनले मर्यादित र जिम्मेवार पत्रकारितामा जोड दिए ।

कार्यक्रममा एआई प्रयोगबारे तालिमको सहजीकरण गरेका अनलाइन टिभी पत्रकार संघका केन्द्रीय अध्यक्ष जीवन भण्डारीले एआईको प्रयोग गरेर पत्रकारिता गरेमा समयको बचत हुनुका साथै पत्रकारको कामको गुणस्तर राम्रो हुने बताए । उनले देशब्यापीरुपमा अनलाइन टिभीमा कार्यरत पत्रकारहरुलाई पत्रकार आचारसंहिताबारे जानकारी गराउँदै डिजिटल मिडियाका सामग्रीहरुलाई थप परिस्कृत बनाउने अभियानमा देशब्यापी दौडाहामा रहेको बताए । कार्यक्रममा जिल्ला प्रहरी कार्यालय बाँकेका प्रहरी निरीक्षक राजकुमार जीटी, क्रियाशील पत्रकार महिला बाँकेका अध्यक्ष सावित्री गिरी लगायत बाँके, बर्दिया, रुपन्देही, पाल्पा, दाङ लगायत सुदुरपश्चिम प्रदेश र कर्णाली प्रदेशका अनलाइन टिभीमा कार्यरत ६० बढी पत्रकारहरुको सहभागिता रहेको थियो ।

प्रकाशित मिति: सोमबार, जेठ ५, २०८२ २२:११