बढैयाताल गाउँपालिकामा योग समिति नेपालको ४०औं योग केन्द्र उद्घाटन

समाचार

गृहपृष्ठ
समाचार
बढैयाताल गाउँपालिकामा योग समिति नेपालको ४०औं योग केन्द्र उद्घाटन

बढैयाताल गाउँपालिकामा योग समिति नेपालको ४०औं योग केन्द्र उद्घाटन

मंगलबार, जेठ १३, २०८२ बागेश्वरी पोस्ट

नेपालगञ्ज । बाँके जिल्लामा दर्ता भएको पहिलो र एक मात्र आधिकारिक योग संस्था योग समिति नेपालले आज बर्दियाको बढैयाताल गाउँपालिकाको ८ नम्बर वडामा ४०औं योग केन्द्रको शुभारम्भ गरेको छ । योग समिति नेपालका परिकल्पनाकार एवं योग गुरु आयुर्वेदाचार्य गिरिराज शर्मा भट्टराईको अध्यक्षतामा भएको उद्घाटन कार्यक्रममा योग समिति नेपालका केन्द्रीय सल्लाहकार, केन्द्रिय समितिका पदाधिकारीहरू, ४०औं योग केन्द्र ब्यवस्थापन समितिका प्रमुख संयोजक कमला ओली क्षेत्री, संयोजक निर्मला आचार्य लगायत सम्पूर्ण सदस्यहरू, सम्पूर्ण केन्द्रका संयोजक, विभिन्न केन्द्रबाट उपस्थित योग प्रशिक्षक, समाजसेवी, पत्रकार तथा नागरिक समाजका अगुवाहरूको उपस्थिति रहेको थियो ।

प्रमुख अतिथि बढैयाताल गाउँपालिकाका अध्यक्ष हिमालय त्रिपाठी र योग गुरू भट्टराईले पानसमा बत्ती बालेर उक्त केन्द्रको शुभारम्भ गरेका थिए । विशिष्ट अतिथि वडा नम्बर ८ का अध्यक्ष चेतनाथ पौडेल रहेका थिए । स्वागत मन्तव्य निर्मला आचार्यले गरेकी थिइन् भने वडा अध्यक्ष पौडेलले शुभकामना मन्तव्य राख्दै योग समिति नेपालमार्फत नेपाली समाजमा फैलिएको चेतना, शारीरिक तथा मानसिक स्वास्थ्यप्रति जागरूकता र गर्विलो योग परम्पराको खुलेर प्रशंसा गरे । कार्यक्रमको मूल उद्देश्य योग प्रशिक्षक क्षेत्रीले प्रकाश पारिन् ।

गाउँपालिका अध्यक्ष त्रिपाठीले यसरी आफ्नो गाउँपालिकामा योग केन्द्र खोल्न पाउनु गर्वको बिषय भएको बताए । उनले विहानको सुतेर जाने समयलाई खेर जान नदिई सबै जना उपस्थिति भई योग गर्न आग्रह गरे । कार्यक्रम सञ्चालन योग समिति नेपालका सचिव चिरञ्जीवी ज्ञवालीले गरेका थिए । कार्यक्रममा योग गुरु आयुर्वेदाचार्य भट्टराईले उर्जाशील प्रवचनसहित योगासन, सुष्म क्रिया, प्राणायाम र ध्यानको माध्यमबाट उपस्थित सम्पूर्णलाई प्रेरित गरेका थिए । उनले शरीर मात्रै बलियो हुनु स्वस्थ नहुने भन्दै शरीर, मन, मस्तिष्क र समाजसँगको सन्तुलन नै साँचो स्वस्थता भएको स्पष्ट पारे ।

त्यस्तै ४०औं योग केन्द्र व्यवस्थापन समिति समेत गठन गरिएको छ । प्रमुख संयोजकमा योग प्रशिक्षक क्षेत्री, संयोजक आचार्य, सह-संयोजक शमशेर मल्ल तथा सदस्यहरूमा गीता केसी, शोभा अधिकारी, उक्त मल्ल, निलम गौतम, पार्वती थारु, पार्वती चौधरी, साबित्रि भट्टराई, मञ्जु पौडेल, कृष्ण कँडेल, रश्मी न्यौपाने, शेषकान्त सुवेदी तथा सल्लाहकारहरूमा गाउँपालिका अध्यक्ष त्रिपाठी, वडा अध्यक्ष पौडेल, वडा सदस्य डिल्लीराम गौतम छन् ।

प्रकाशित मिति: मंगलबार, जेठ १३, २०८२ १८:१०

प्रतिक्रिया दिनुहोस्