प्रभावकारी वन व्यवस्थापनका लागि समुदायमा सचेतना बढाउनुपर्नेमा जोड

समाचार

गृहपृष्ठ
समाचार
प्रभावकारी वन व्यवस्थापनका लागि समुदायमा सचेतना बढाउनुपर्नेमा जोड

प्रभावकारी वन व्यवस्थापनका लागि समुदायमा सचेतना बढाउनुपर्नेमा जोड

शुक्रबार, जेठ २३, २०८२ बागेश्वरी पोस्ट

नेपालगञ्ज । बाँकेमा वन व्यवस्थापनका लागि समुदायमा सचेतना फैलाउन आवश्यक रहेकोमा जोड दिइएको छ । वन व्यवस्थापनका सवाल, चुनौती र अवसरका विषयमा रेडियो कृष्णसार एफएम ९४ मेगाहर्जको आयोजना तथा डिभिजन वन कार्यालय बाँकेको सहयोगमा गरिएको विशेष रेडियो संवाद कार्यक्रमका सहभागीहरुले वनमा भइरहने आगलागी, चरिचरण, फोहोरमैलाको व्यवस्थापन, वन पैदावर र आयआर्जन लगायतका विषयमा सामुदायिक वनका उपभोक्ताहरु सबै जना सचेत नहुँदा सोचे अनुरुप उपलब्धि हासिल हुन नसकेको बताएका हुन् ।

डिभिजन वन कार्यालय बाँकेको वन, वन्यजन्तु, जैविक विविधता संरक्षण तथा व्यवस्थापन कार्यक्रम अन्तर्गत गरिएको कार्यक्रममा सामुदायिक वनका पदाधिकारी र सरोकारवालाहरुबीच सवालजवाफ गरिएको थियो । कार्यक्रममा सिर्जना सामुदायिक वनका अध्यक्ष सुमन पौडलले सामुदायिक वनले पर्यटनमा पनि राम्रो काम गर्न सक्ने बताउँदै नेतृत्व ब्यवस्थापनको सवाललाई बलियो बनाउनुपर्ने बताए । यस्तै अर्का सहभागी आरती सामुदायिक वनका उपाध्यक्ष मुक्ति प्रसाद थारुले वनमा हुने चरिचरण रोक्न नसकिएको गुनासो गरे । साथै उनले वनपैदावर व्यवस्थापनमा पनि चुनौति थपिएको भन्दै समाधानका लागि सरोकारवालाहरु समक्ष प्रश्न गरे । यस्तै अन्य सहभागीहरुले वनलाई दिइने अनुदान कार्यक्रम, पर्यटनको सवालमा सामुदायिक वनले पाउने सहयोग, उपभोक्ता शिक्षा र वनको आयआर्जनको सवालमा जिज्ञासा राखेका थिए ।

कार्यक्रममा सहभागीहरुका सवाललाई सम्बोधन गर्दे डिभिजन वन कार्यालय बाँकेका बरिष्ठ वन अधिकृत बाबुराम पोख्रेलले वन ब्यवस्थापन अन्तर्गत काठ दाउरा उत्पादन, ढलापडा काठ संकलन, झाडी ब्यबस्थापन र बन्यजन्तुको द्वन्द न्यूनीकरणमा सहयोग पुग्ने खालका कार्यक्रमहरु सञ्चालन गरिरहेको बताए । उनले डिभिजन वन कार्यालयले विभिन्न चेतनामूलक कार्यक्रमहरु र तालिमहरु संचालन गरी दिगो वन ब्यवस्थापन गर्ने काममा सहजीकरण गरिरहेको र आगामी दिनमा सामुदायिक वनको आवश्यकताका आधारमा कार्यक्रम गर्ने बताए । यस्तै अर्का सरोकारवाला कोहलपुर सब-डिभिजन वन कार्यालयका प्रमुख प्रभात दाहालले वनमा हुने चोरी तस्करी रोक्नका लागि अनुगमन गर्ने काम गरिरहेको बताए ।

सामुदायिक वन उपभोक्ता महासंघ बाँकेका अध्यक्ष साबित्रा पुनले सामुदायिक वनले समुदायको विकासमा खेलेको भूमिकालाई अझै रचनात्मक बनाउन जरुरी रहेको बताइन् । उनले यसका लागि समन्वयात्मक भूमिकामा जोड दिइन् । कोहलपुर नगरपालिका वडा नम्बर १२ का वडा सदस्य मनिसरा श्रेष्ठले सामुदायिक वनको दिगो ब्यबस्थापनका लागि पहल थाल्ने बताइन् । यस्तै सरोकारवाला सामुदायिक वन उपभोक्ता महासंघ नगर कमिटी कोहलपुरका अध्यक्ष किष्ण रानाले वन, वन्यजन्तु र जैविक विविधता कायम राख्नका लागि सामुदायिक वनहरुले बार्षिक कार्ययोजना निर्माणकै बेला विशेष ध्यान दिनुपर्नेमा जोड दिए । कार्यक्रममा सरोकारवाला निकायका ब्यक्तिहरु, संचारकर्मी र विभिन्न सामुदायिक वनका पदाधिकारी गरी ३१ जनाको सहभागिता रहको थियो ।

कार्यक्रमको सहजीकरण कृष्णसारकर्मी साबित्री गिरीले गरेकी थिइन् भने कार्यक्रममा समन्वय बाँकेको कोहलपुर नगरपालिका वडा नम्बर १२ मा रहेको सृजना सामुदायिक वनले गरेको थियो ।

प्रकाशित मिति: शुक्रबार, जेठ २३, २०८२ २०:२६