सिक्टा सिंचाई आयोजनाले गति लिँदै, ११ किलोमिटर लामो गुरुवागाउँ शाखा नहरमा पानी छोडियो

समाचार

गृहपृष्ठ
समाचार
सिक्टा सिंचाई आयोजनाले गति लिँदै, ११ किलोमिटर लामो गुरुवागाउँ शाखा नहरमा पानी छोडियो

सिक्टा सिंचाई आयोजनाले गति लिँदै, ११ किलोमिटर लामो गुरुवागाउँ शाखा नहरमा पानी छोडियो

सोमबार, असार १६, २०८२ बागेश्वरी पोस्ट

नेपालगञ्ज । राष्ट्रिय गौरबको सिक्टा सिंचाई आयोजनाले पछिल्लो समय तीब्र गतिमा काम अघि बढाएको छ । बाँकेको ४३ हजार हेक्टर क्षेत्रफलमा सिंचाई सुविधा पु¥याउने उद्देश्यका साथ निर्माणाधीन आयोजनाले पछिल्लोपटक पश्चिम मूल नहरको छैठौं शाखा नहर निर्माण सम्पन्न गरेर पानी छोडेको छ । बैजनाथ गाउँपालिका वडा नम्बर ५ मा निर्मित गुरुवागाउँ शाखा नहरमा आज पानी परीक्षण कार्य गरिएको छ । पानी परीक्षण कार्यको आयोजना प्रमुख राजु आचार्य, बैजनाथ गाउँपालिका वडा नम्बर ५ का वडा अध्यक्ष देब बहादुर रावत, वडा नम्बर ६ का अध्यक्ष भुपाल पुन मगर, सिक्टा सिंचाई आयोजना जल उपभोक्ता समितिका अध्यक्ष शालिकराम डाँगी, नेपाल पत्रकार महासंघ बाँकेका अध्यक्ष नवीन गिरी लगायतले संयुक्तरुपमा पानी छाडेर शुभारम्भ गरे ।

May be an image of 4 people and text

भैरब सुभानी जेभी काठमाडौंले तीन बर्षभित्र काम सम्पन्न गर्ने गरी २०८० चैत १८ गते सम्झौता गरेकोमा सम्झौता अवधि अगावै काम सम्पन्न भएको छ । २०८३ चैत १७ गते सम्पन्न गर्नुपर्ने मिति हो । ३७ करोड ८२ लाख ८४ हजार ७ सय ३५ रुपैयाँमा ठेक्का गरिएको आयोजनाका इन्जिनियर विनेश श्रेष्ठले बताए । उनका अनुसार हालसम्म ९८ प्रतिशत भौतिक प्रगति भएको छ । अब केही सामान्य फिनिसिंगको काम मात्र बाँकी छ । कुल ११ किलोमिटर लामो यो नहरबाट ७ हजार ८१ हेक्टर क्षेत्रफलमा सिंचाई सुविधा पुग्ने इन्जिनियर श्रेष्ठले बताए । गुरुवागाउँ नहरबाट एक लाख जनसंख्या लाभान्वित हुनेछन् । नहरमा पानी छोडिएपछि किसान हर्षित भएका छन् । रोपाइँको समयमा किसानले पम्पसेट लगाएर धमाधाम पानी तानिरहेका छन् । अब यो नहरबाट प्रशाखा र उपशाखा निर्माण भएपछि किसानलाई अझ सहज हुनेछ ।

May be an image of 1 person

पश्चिम मूल नहरबाट ३३ हजार ७ सय ६६ हेक्टर जमिन सिंचाई सुविधा पु¥याउने लक्ष्य छ । आयोजना प्रमुख आचार्यले मुआब्जा दिएर नयाँ नहर बनाइएको बताए । आचार्यले स्रोत साधन व्यवस्थित तरिकाले प्रभावकारीरुपमा परिचालन गर्न सके समय अगावै काम सकिने सन्देश यो नहर निर्माण कार्यले दिएको बताए । अब यसपछि शाखा नहरको प्रशाखा र उपशाखा निर्माण गरिने आयोजनाका सिनियर डिभिजनल इन्जिनियर मनोज कुमार साहले जानकारी दिए । कार्यक्रममा आयोजनाका उपसचिव (लेखा) तुकमान पुन मगर, आयोजनाका इन्जिनियरहरु, ठेकेदार कम्पनीका प्रतिनिधि, पत्रकार लगायतको उपस्थिति थियो । नहरमा पानी छोडिसकेपछि ११ किलोमिटर नहर क्षेत्रको अवलोकन समेत गरिएको थियो । स्थानीयको माग र सहजताका लागि बस्ती क्षेत्रमा नहर छेउँछाउँमा तारजाली लगाइएको छ भने कतिपय स्थानमा सिंढी समेत बनाइएको छ ।

No photo description available.

राष्ट्रिय गौरवको सिक्टा सिंचाई आयोजनाको हालसम्म करीब आधा काम पूरा भएको छ । आर्थिक बर्ष २०६२/६३ देखि सिक्टा सिंचाई आयोजनाको काम सुरु भएको थियो । पहिलोपटक १२ अर्बको गुरुयोजना स्वीकृत भएर काम अघि बढेको थियो । उक्त गुरुयोजनामा राप्तीसोनारी-२ अगैयामा बाँध बनाउने र पश्चिम नहर निर्माण गर्ने कार्य योजना मात्रै थियो । विस्तारै आयोजनाको कार्य क्षेत्र बढ्दै गयो । पूर्वी नहर पनि थपियो । त्यस्तै पश्चिमी र पूर्वी नहरमा शाखा-प्रशाखाहरु थप हुँदै गए । राप्ती नदीबाट कमाण्ड एरियालाई जोगाउन नदी नियन्त्रणका कामहरु पनि थपिँदै गए । दोस्रो पटक २०७४ सालमा २५ अर्बको गुरुयोजना स्वीकृत भयो । पछिल्लो पटक फेरि २०७९ सालमा ५२ अर्बको गुरुयोजना स्वीकृत भएको छ । त्यसै अनुसार अहिले सिक्टा सिंचाई आयोजनाले काम गरिरहेको आयोजना निर्देशक आचार्यले बताए ।

May be an image of 10 people May be an image of 5 people