किसानलाई सहजरुपमा मल उपलब्ध गराउन किसान महासंघ बाँकेको पहल

समाचार

गृहपृष्ठ
समाचार
किसानलाई सहजरुपमा मल उपलब्ध गराउन किसान महासंघ बाँकेको पहल

किसानलाई सहजरुपमा मल उपलब्ध गराउन किसान महासंघ बाँकेको पहल

आइतबार, साउन १८, २०८२ बागेश्वरी पोस्ट

नेपालगञ्ज । बाँकेका किसानलाई रासायनिक मलको चरम अभाव भएको भन्दै नेपाल किसान महासंघ बाँकेले आवश्यक पहल गरेको छ । नेपाल किसान महासंघ बाँकेले आज सम्बद्ध सरोकारवालालाई भेटेर किसानलाई सहजरुपमा मल उपलब्ध गराउन पहल गरेको हो । किसानलाई समयमै रासायनिक मल उपलब्ध गराउन पहल गर्ने उद्देश्यले महासंघको एक टोली कृषि सामाग्री केन्द्र तथा साल्ट ट्रेडिङ कर्पोरेसन लिमिटेड प्रदेश कार्यालय नेपालगञ्ज पुगेको थियो । नेपाल किसान महासंघ बाँकेका सचिव ललित कुमार रौनियार नेतृत्वको टोलीले किसानलाई सहज र सरलरुपमा मल उपलब्ध गराउन अनुदानमा रासायनिक मल उपलब्ध गराइरहेका ती कार्यालयका प्रमुखको ध्यानाकर्षण गराएको हो ।

यसैबीच उक्त टोलीले आज नै जिल्ला प्रहरी कार्यालय बाँकेका प्रमुख एसपी रामप्रसाद घर्ती मगरलाई समेत भेटेर मलको चरम अभावका बेला किसानले भारतबाट ल्याउने मल सुरक्षाकर्मीले रोक्ने गरेकोले त्यसमा ध्यान दिन आग्रह गरेको थियो । नेपाली काँग्रेस बाँकेका कार्यबहाक सभापति गोपालप्रसाद अधिकारी सम्मलित महासंघ बाँकेको उक्त टोलीले गरेको मागलाई सम्बोधन गर्दै बाँके प्रहरी प्रमुख घर्ती मगरले किसानको पहिचान खुल्ने गरी जग्गाको लालपुर्जाको फोटोकपी लिएर १–२ बोरा मल ल्याउन दिन मातहतका सुरक्षाकर्मीलाई मौखिक निर्देशन दिएको बताए ।

प्रकाशित मिति: आइतबार, साउन १८, २०८२ २१:३८

प्रतिक्रिया दिनुहोस्