मानव बेचविखन सम्बन्धि राष्ट्रिय प्रतिवेदन तयार गर्न 'केन्द्रिकृत समूह छलफल' गर्दै मानव अधिकार आयोग

समाचार

गृहपृष्ठ
समाचार
मानव बेचविखन सम्बन्धि राष्ट्रिय प्रतिवेदन तयार गर्न 'केन्द्रिकृत समूह छलफल' गर्दै मानव अधिकार आयोग

मानव बेचविखन सम्बन्धि राष्ट्रिय प्रतिवेदन तयार गर्न 'केन्द्रिकृत समूह छलफल' गर्दै मानव अधिकार आयोग

बिहीबार, साउन २९, २०८२ बागेश्वरी पोस्ट

नेपालगञ्ज । राष्ट्रिय मानव अधिकार आयोगले मानव बेचविखन तथा ओसारपसारको पछिल्लो अवस्था चित्रण गर्न देशब्यापी 'केन्द्रिकृत समूह छलफल' थालेको छ । मानव बेचविखन तथा ओसारपसारको पछिल्लो अवस्थालाई राष्ट्रिय प्रतिवेदनमार्फत सार्वजनिक गर्नका लागि सूचना, तथ्यांक तथा सुझाब संकलनका लागि देशब्यापी 'केन्द्रिकृत समूह छलफल' थालेको राष्ट्रिय मानव अधिकार आयोगले जनाएको छ ।

कोशी र मधेश प्रदेशमा पेशागतरुपमा विभिन्न सरोकारवाला सरकारी, गैरसरकारी तथा नागरिक समाजसंग अन्तरक्रिया, छलफल गर्दै सुझाब संकलन गरिसकेको आयोगले लुम्बिनी प्रदेशको बुटवल र नेपालगञ्जमा पनि 'केन्द्रिकृत समूह छलफल' गरेको आयोगका सहसचिव नवराज सापकोटाले बताए । यस विषयमा आज नेपालगञ्जमा छलफल गरिएको छ ।

सीमावर्ती क्षेत्र नेपालगञ्जमा मानव बेचविखन तथा ओसारपसारको जोखिम उच्च रहेकोले यहाँका सरोकारवालासंग अन्तरक्रिया गरेर राष्ट्रिय प्रतिवेदनका लागि पृष्ठपोषण संकलन गरिएको सापकोटाले जानकारी दिए । कार्यक्रममा बेचविखन विरुद्ध क्रियाशील संघसंस्थाका प्रतिनिधि, अधिबक्ता, अधिकारकर्मी, पत्रकार लगायतले जिल्लाको अवस्था, मानव बेचविखन नियन्त्रणमा देखिएका चुनौती, अपनाउनुपर्ने रणनीति, विद्यमान त्रुटीहरु लगायतका विषयमा धारणा ब्यक्त गर्दै सुझाब समेत दिएका छन् । पछिल्लो अन्तर्राष्ट्रिय प्रतिबेदन अनुसार नेपालमा मानव बेचविखन र ओसारपसारको अवस्था भयाबह छ ।

राष्ट्रिय मानव अधिकार आयोगका सदस्य लिली थापाले मानव बेचविखनको स्वरुप र आयाम नयाँ ढंगले विकसित भइरहेकोले त्यसलाई लक्षित गरी अबको रणनीति तय गर्नुपर्ने आवश्यकता औंल्याइन् । नयाँ विकसित आयामहरुलाई बुझ्न सक्नुपर्नेमा उनको जोड छ । कार्यक्रममा प्रा. डा. गोविन्द सुवेदीले मानव बेखविखनको पछिल्लो अवस्था, केन्द्रिकृत समूह छलफल का लागि तय भएको विषयबस्तुबारे प्रस्तुतिकरण गरेका थिए ।

कार्यक्रममा राष्ट्रिय मानव अधिकार आयोग नेपालगञ्ज कार्यालय प्रमुख द्वारिका अधिकारी, इन्सेकका लुम्बिनी संयोजक भोला महत, नेपाल पत्रकार महासंघ बाँकेका अध्यक्ष नवीन गिरी, माइती नेपालका नेपालगञ्ज प्रमुख केशव कोइराला, शक्ति समूहकी निर्मला पौडेल, साथीकी सरस्वती शर्मा पराजुली, फातिम फाउण्डेशनकी मैमुना सिद्दिकी, शान्ति पुनः स्थापना गृहकी सम्झना चँदारा, अधिबक्ताहरु बसन्त गौतम, सुरेश गौतम, अधिकारकर्मीहरु कमला पन्त, शोभा विसी, विनोद थापा, पत्रकारहरु रुपा गहतराज, सावित्री गिरी लगायतले छलफलमा भाग लिएका थिए ।

प्रकाशित मिति: बिहीबार, साउन २९, २०८२ १९:३३

प्रतिक्रिया दिनुहोस्