बर्दियामा बाघको आक्रमणबाट एक महिलाको मृत्यु

समाचार

गृहपृष्ठ
समाचार
बर्दियामा बाघको आक्रमणबाट एक महिलाको मृत्यु

बर्दियामा बाघको आक्रमणबाट एक महिलाको मृत्यु

शनिबार, साउन ३१, २०८२ बागेश्वरी पोस्ट

बर्दिया । बाघको आक्रमणमा बर्दियामा एक महिलाको मृत्यु भएको छ । जिल्लाको गुलरिया नगरपालिका-१२ भैसाहीको पश्चिमतर्फ पर्ने नर्सरी नजिकै आफ्नै खेतमा काम गर्ने क्रममा बाघले आक्रमण गर्दा भैसाहीकी करिब ४५ वर्षीया जगतरानी थारुको मृत्यु भएको जिल्ला प्रहरी कार्यालय बर्दियाले जानकारी दिएको छ ।

जिल्ला प्रहरी कार्यालय बर्दियाका अनुसार बाघको आक्रमणमा जगतरानीको शरीर र टाउको अलग भएको अवस्थामा आज बिहान सवा ११ बजेतिर शव फेला परेको थियो ।

स्थानीयले जगतरानीको शव देखेपछि वन कार्यालय, नेपाल प्रहरी र सशस्त्र प्रहरीलाई खबर गरेका हुन् । खबर पाए लगत्तै सुरक्षा र वन कार्यालयको टोली घटनास्थल पुगेको थियो ।

जगतरानीलाई ममफली गोड्न खेतमा गएका बेला बाघले आक्रमण गरेको प्रहरीले जनाएको छ भने उनी शुक्रबार बेलुका नै खेतमा गएको बताइएको छ । एउटै गाउँमा घर र माइती भएका कारण शुक्रबार अबेरसम्म घर नआउँदा पनि खोजी कार्य नभएको पाइएको प्रहरीले बताएको छ ।

उनका श्रीमान् र जेठा छोरा वैदेशिक रोजगारको सिलसिलामा विदेशमा छन् भने कान्छा छोरा र बुहारी घरमै छन् ।जगतरानीको शवलाई पोस्टमार्टमका बर्दिया जिल्ला अस्पतालमा राखिएको बर्दिया प्रहरीले जानकारी दिएको छ ।