नेपालगञ्जमा 'शासकीय सुधार संवाद श्रृंखला कार्यक्रम'

समाचार

गृहपृष्ठ
समाचार
नेपालगञ्जमा 'शासकीय सुधार संवाद श्रृंखला कार्यक्रम'

नेपालगञ्जमा 'शासकीय सुधार संवाद श्रृंखला कार्यक्रम'

आइतबार, भदौ १५, २०८२ बागेश्वरी पोस्ट

नेपालगञ्ज । नेपालगञ्जमा 'शासकीय सुधार संवाद श्रृंखला कार्यक्रम' सम्पन्न भएको छ । प्रधानमन्त्री तथा मन्त्रीपरिषद कार्यालयको आयोजनामा कार्यक्रम सम्पन्न भएको हो । शासकीय सुधारका लागि ९ वटा विषयबस्तुहरुमा संवाद गरिएको थियो । नागरिक समाज, निजी क्षेत्र, सञ्चार क्षेत्र, सेवाग्राही समेतबाट पृष्ठपोषण लिने गरी आयोजना गरिएको कार्यक्रममा जिल्लास्थित सरकारी कार्यालयका प्रमुख एवम् प्रतिनिधि, सुरक्षा निकायका प्रमुख, पत्रकार, नागरिक समाजका प्रतिनिधि, निजी क्षेत्रका प्रतिनिधि, सेवाग्राही लगायत सरोकारवाला उपस्थित थिए ।

संवादका विषयबस्तुहरुमा संघियता सबलीकरण गर्न विभिन्न तहका सरकारको भूमिका, कार्य र वित्तीय सम्बन्धमा देखिएका समस्या, योग्यता, क्षमता र जवाफदेहिता सुनिश्चित गर्न निजामति सेवामा गर्नुपर्ने सुधारहरु, विश्वसनीय बजेट र प्रभावकारी सार्वजनिक खरिदका लागि सार्वजनिक वित्तीय ब्यवस्थापनमा गर्नुपर्ने सुधार, भ्रष्टाचार रोकथाम तथा पारदर्शिता र जवाफदेहिता प्रबद्र्धन गर्दै सत्यनिष्ठ प्रणाली सुदृढ गर्ने उपाय, राम्रो सेवा प्रवाह र नागरिक सहभागिताका लागि डिजिटल सुशासनको उपयोग गर्ने सम्बन्धमा देखिएका समस्या लगायत थिए ।

यस्तै महिला, सीमान्तकृत समूह र भौगोलिक रुपमा विकट स्थलमा रहेका जनसंख्याको लागि समावेशी शासन सुनिश्चित गर्ने उपाय, जोखिम कम गर्न र उत्थानशिलता सुधार गर्न विपद् र जलबायु सुशासनको बृद्धि गर्ने उपाय, सुधारका पर्यत्नहरुलाई दिगो बनाउन र देखिने गरी सार्वजनिक सेवामा सुधार गर्न चाल्नुपर्ने कदम र जनविश्वास हासिल गर्न र सेवाको गुणस्तर बृद्धि गर्न गरिएका राम्रा कामहरुको चर्चा जस्ता विषयमा संवाद गरिएको थियो ।

कार्यक्रममा प्रधानमन्त्री तथा मन्त्रीपरिषद कार्यालयका शासकीय सुधार महाशाखा प्रमुख डा. भिष्म कुमार भुषालले कार्यक्रमको उद्देश्यमाथि प्रकाश पारेका थिए । त्यसक्रममा नेपाल पत्रकार महासंघ बाँकेका अध्यक्ष नवीन गिरी, नेपालगञ्ज उद्योग बाणिज्य संघका महासचिव भिम बहादुर रानाभाट, नागरिक समाजका प्रभात कुमार ठकुरी, पत्रकार विरेन्द्र जैसी, सेवाग्राही विनोद अग्रहरी लगायतले आ-आफ्ना अनुभव सुनाउँदै सुझाब समेत दिएका थिए ।

नेपालगञ्ज उपमहानगरपालिकाको सभाहलमा आयोजित कार्यक्रममा बाँकेका प्रमुख जिल्ला अधिकारी धर्मराज जोशी, नेपालगञ्ज उपमहानगरपालिकाका प्रमुख प्रशासकीय अधिकृत रामहरि शर्मा लगायतले पनि बोलेका थिए । कार्यक्रमको समन्वय जिल्ला प्रशासन कार्यालय बाँकेले गरेको थियो ।

प्रकाशित मिति: आइतबार, भदौ १५, २०८२ २१:०७

प्रतिक्रिया दिनुहोस्