आगजनीले क्षतिग्रस्त बार भवन मर्मतपछि भुइँ तलाबाट बाँके जिल्ला अदालतको सेवा प्रवाह !

समाचार

गृहपृष्ठ
समाचार
आगजनीले क्षतिग्रस्त बार भवन मर्मतपछि भुइँ तलाबाट बाँके जिल्ला अदालतको सेवा प्रवाह !

आगजनीले क्षतिग्रस्त बार भवन मर्मतपछि भुइँ तलाबाट बाँके जिल्ला अदालतको सेवा प्रवाह !

मंगलबार, कात्तिक ११, २०८२ बागेश्वरी पोस्ट

नेपालगञ्ज । गत भदौ २३ र २४ गते भएको ‘जेन-जी’ आन्दोलनका क्रममा भदौ २४ गते गरिएको आगजनी र तोडफोडका कारण जिल्ला अदालत बाँके र उच्च अदालत तुलसीपुर नेपालगञ्ज इजलाश भवन क्षतिग्रस्त भए । सो आगजनीमा अदालतसँगै बाँके जिल्ला अदालत परिसरमै रहेको उच्च अदालत बार एशोसिएसन नेपालगञ्ज र बाँके जिल्ला अदालत बार एशोसिएसनको संयुक्त भवन पनि क्षतिग्रस्त भएको थियो ।

विपद्को बेला सरकारी संरचना नष्ट भएका कारण न्याय सम्पादनमा समस्या उत्पन्न भए पनि वकिलहरुको पेशागत साझा संगठन बार एशोसियसनले आफ्नै पहल र स्रोतसाधन प्रयोग गरी भवन मर्मतसम्भार गर्न सफल भयो । वकिलहरुले नै आफैं पैसा उठाएर भवन मर्मतसम्भार र रंगरोगन समेत गरे । उच्च अदालत बार एशोसिएसन नेपालगञ्जका अध्यक्ष चित्र बहादुर शाहीका अनुसार जिल्ला अदालत बाँकेको अनुरोधमा बारको मर्मतसम्भार गरिएको भवनबाट सेवा प्रबाह गर्ने गरी भुइँ तला आजदेखि जिल्ला अदालतलाई हस्तान्तरण गरिएको छ । यससँगै जिल्ला अदालतले बारको भुइँ तलाबाट नियमित सेवा सुरु गर्ने गरी सेटअपको काम अघि बढाएको छ ।

No photo description available. (आगजनीपछि मर्मतसम्भार गरिएको बार भवन)

अध्यक्ष शाहीले भने, “सरकारी संरचना ध्वस्त भएको कठिन अवस्थामा पनि बारले आफ्नो स्रोत साधन र श्रमबाट मर्मतसम्भार गरी न्यायिक सेवा निरन्तरता दिन सहयोग गरेको हो ।” उनका अनुसार यो कार्य वकिलहरुको ऐक्यबद्धता र न्यायप्रति प्रतिबद्धताको उदाहरण पनि हो । आगजनीबाट करीब १५ लाख बराबरको क्षति भएको बारले जनाएको छ । तर, पहिलो चरणमा कानुन व्यवसायीहरुबाटै २ लाख ४ हजार रुपैयाँ संकलन गरेर मर्मत र रंगरोगनको काम सम्पन्न गरिएको बाँक जिल्ला अदालत बार एशोसिएसनका अध्यक्ष मेहर सिंह खत्रीले बताए । आगजनीले परेको गम्भीर क्षतिपछि बारको यो पहलले पुनः न्यायिक सेवा सहज बनाउन सहयोग पुर्‍याएको वरिष्ठ अधिवक्ता लोकबहादुर शाहले बताए ।

भदौ २४ गते भएको आगजनीमा अदालत परिसरका महत्वपूर्ण कागजात, संरचना र उपकरण जलेका थिए । आगलागी र तोडफोडका कारण अदालतको भुइँ तला बढी क्षतीग्रस्त भएको छ । अदालतले अर्को व्यवस्था नभएसम्मका लागि बारको भवन प्रयोग गर्नेछ । इजलाश अदालतकै क्षतिग्रस्त भवनबाट सुचारु गरे पनि बाँकी सम्पूर्ण सेवा बार भवनबाट प्रदान गरिनेछ । नेपाल कानुन ब्यवसायी परिषद् लुम्बिनी सदस्य अधिवक्ता ईश्वरी प्रसाद ज्ञवालीले बारले अदालतलाई न्यायिक कार्य सम्पादनका लागि भुइँ तला उपलब्ध गराउनु अनुकरणीय र प्रशंसनीय काम भएको बताए । ज्ञवालीले अब अबरुद्ध न्याय सेवाले गति लिने विश्वास ब्यक्त गरे ।

No photo description available. (आगजनीपछि क्षतिग्रस्त बार भवन)