बाँकेमा मतदाता नामावलीमा नाम दर्ता गराउनेको भीड

समाचार

गृहपृष्ठ
समाचार
बाँकेमा मतदाता नामावलीमा नाम दर्ता गराउनेको भीड

बाँकेमा मतदाता नामावलीमा नाम दर्ता गराउनेको भीड

मंगलबार, कात्तिक २५, २०८२ बागेश्वरी पोस्ट

नेपालगन्ज । बाँकेमा मतदाता नामावलीमा नाम दर्ता गराउनको भीड छ । आगामी फागुन २१ गतेका लागि तोकिएको प्रतिनिधिसभा निर्वाचनका लागि गएको असोज १० गतेदेखि यही कार्तिक मसान्तसम्म मतदाता नामावलीमा नाम दर्ता गराउने समय सीमा तोकिएपछि निर्वाचन कार्यालय बाँकेमा भीड बढेको हो ।

जिल्ला निर्वाचन कार्यालय बाँकेका प्रमुख टेकबहादुर शाहीका अनुसार हिजो आज दैनिक तीन सय बढी नयाँ मतदाता नामावली दर्ताका लागि कार्यालय आउने गरेका छन् । कार्तिक २१ गतेसम्म बाँकेमा ५ हजार २२९ जना नयाँ मतदाता थपिएका छन् । ती मध्ये पुरुष २ हजार ६०६ र महिला २ हजार ६२३ जना रहेको शाहीले बताए । उनका अनुसार अधिकांश मतदाता नव युवा छन् । १८ देखि २५ वर्ष उमेर समूहका बढी छन् ।

मतदाता नामावलीका लागि नाम दर्ता गराउन निर्वाचन कार्यालय पुगेका नेपालगन्जका २५ वर्षीय विरेन्द्र कुमार यादवले आगामी निर्वाचनमा मतदान गर्न आतुर रहेको बताए । मुलुकको बदलिँदो राजनीतिक घटनाक्रमसँगै केही आशा देखिएकाले पहिलो पटक मतदान गर्नका लागि आफूले मतदाता नामावलीमा नाम दर्ता गराएको उनले बताए । कोहलपुरकी २० वर्षीया लक्ष्मी सुनार पनि मतदाता नामावलीमा नाम दर्ता गराउँदा उत्साहित देखिन्छिन् । देशको विकास गर्ने प्रतिनिधिलाई मतदान गर्ने योजना उनले बनाइसकेकी छिन् ।

बाँकेमा २०७९ सालको निर्वाचनमा ३ लाख ३३ हजार ९३४ जना मतदाता थिए । त्यसमा १ लाख ६९ हजार ८७६ पुरुष, १ लाख ६४ हजार ४९ महिला र अन्य ९ जना थिए । निर्वाचन कार्यालयमा अहिले नयाँ मतदाता नामावलीमा नाम दर्ता गर्ने, त्रुटि सच्चाउने, ठाउँसारी गर्ने लगायतका कामहरु भइरहेको कार्यालय प्रमुख शाहीले बताए ।

प्रकाशित मिति: मंगलबार, कात्तिक २५, २०८२ २१:१३

प्रतिक्रिया दिनुहोस्