अपाङ्गता भएका ब्यक्तिहरुलाई प्रदान गरिएका सेवा सुविधालाई ब्यवहारिक बनाइनुपर्नेमा जोड

समाचार

गृहपृष्ठ
समाचार
अपाङ्गता भएका ब्यक्तिहरुलाई प्रदान गरिएका सेवा सुविधालाई ब्यवहारिक बनाइनुपर्नेमा जोड

अपाङ्गता भएका ब्यक्तिहरुलाई प्रदान गरिएका सेवा सुविधालाई ब्यवहारिक बनाइनुपर्नेमा जोड

बुधबार, मंसिर १७, २०८२ बागेश्वरी पोस्ट

नेपालगञ्ज । अपाङ्गता भएका ब्यक्तिहरुलाई प्रदान गरिएका सेवा सुविधालाई ब्यवहारिक बनाइनुपर्नेमा आज नेपालगञ्जमा आयोजित एक कार्यक्रममा जोड दिइएको छ । ३४औं अन्तर्राष्ट्रिय अपाङ्गता दिवसको अवसरमा सरोकारवालासंग अपाङ्गता भएका व्यक्तिहरुको सवालमा गरिएको संवाद कार्यक्रमका सहभागीहरुले कानुनमा उल्लेख गरिएका अधिकारहरु पनि ब्यवहारिक नभएकोले ब्यवहारिक बनाउन आवश्यक रहेको बताएका हुन् । नेपालगञ्ज उपमहानगरपालिका र नगर स्तरीय अपाङ्ग सञ्जालको आयोजना तथा सेभ द चिल्ड्रेन, एसडिएफ बाँके, नेपाल संरक्षक समाज, रेडियो कृष्णसार एफएम र डेक नेपाल लगायत आधा दर्जन बढी संघसंस्थाहरुको सहकार्यमा गरिएको कार्यक्रममा सहभागीहरुका प्रश्नमाथि सवालजवाफ र प्रतिबद्धता ब्यक्त गरिएको थियो ।

कार्यक्रमको प्यानल लिष्टमा जिल्ला प्रहरी कार्यालय बाँकेका इन्सपेक्टर रमेश विष्ट, जिल्ला ट्राफिक प्रहरी पोष्ट नेपालगञ्जका प्रहरी नायव निरिक्षक रविन्द्र बहादुर बम, यातायात ब्यवसायी महासंघ बाँकेका बरिष्ठ सल्लाहकार शोभाकर पौडेल, नेपालगञ्ज उपमहानगरपालिका महिला बालबालिका तथा जेष्ठ नागरिक शाखाका प्रमुख पवित्रा कुमारी पुरी, अपांगता अधिकारकर्मी भावुकजंग थापा र गोकर्ण आचार्य रहेका थिए । संवाद अघि बोल्दै नेपालगञ्ज उपमहनगरपालिकाका मेयर प्रशान्त बिष्टले अपाङ्गमैत्री उपमहानगरपालिका बनाउने प्रतिबद्धता जनाएका थिए । अपाङ्गता भएका व्यक्तिहरुको सचेतना, क्षमता बिकास तालिम लगायतका कार्यक्रम सञ्चालन गर्दै आएको पनि उनले बताए । यस्तै बाँकेका प्रमुख जिल्ला अधिकारी दिल कुमार तामाङले अपांगताका क्षेत्रमा बनेका ऐन तथा कानुनको ब्यवहारिक कार्यान्वन नभएको पाइएमा उजुरी गर्न आग्रह गरे । उनले राज्यका सबै निकायले अपांगतामैत्री भवन र सेवाप्रवाह गर्नुपर्ने धारणा राख्दै कार्यान्वयनका लागि आग्रह समेत गरे ।

कार्यक्रममा नेपालगञ्ज उपमहानगरपालिकाका महिला, बालबालिका तथा जेष्ठ नागरिक महाशाखाका प्रमुख पुरीले अपाङ्गता भएका व्यक्तिहरुको हक अधिकारका लागि काम गर्दै आएको बताइन् । यस्तै यातायात व्यावसायी महासंघ बाँकेका बरिष्ठ सल्लाहकार पौडेलले अपाङ्गता भएका व्यक्तिहरुलाई यातायातका क्षेत्रबाट सम्बोधन गर्ने प्रतिबद्धता ब्यक्त गरे । कार्यक्रममा जिल्ला प्रहरी कार्यालय बाँकेका प्रहरी निरीक्षक बिष्टले पनि अपाङ्गता भएका व्यक्तिहरुको लागि सहज सेवा प्रवाहलाई अझै प्रभावकारी बनाइने बताए । कार्यक्रममा विभिन्न प्रकारका अपांगता भएका ब्यक्तिहरु, संघसंस्थाका प्रतिनिधिहरु तथा सरोकारवालाहरुको बाक्लो उपस्थिति रहेको थियो ।

May be an image of one or more people