कोहलपुर नगरपालिकाद्वारा हिउँदे अधिवेशन अन्त्यको घोषणा

स्थानीय

गृहपृष्ठ
स्थानीय
कोहलपुर नगरपालिकाद्वारा हिउँदे अधिवेशन अन्त्यको घोषणा

कोहलपुर नगरपालिकाद्वारा हिउँदे अधिवेशन अन्त्यको घोषणा

शुक्रबार, पुस २५, २०८२ बागेश्वरी पोस्ट

कोहलपुर (बाँके) । कोहलपुर नगरपालिकाले आफ्नो हिउँदे अधिवेशन अन्त्य गरेको छ । आज उन्नाइसौं नगर सभा सम्पन्न भएसँगै नगर प्रमुख पूर्ण प्रसाद आचार्यले चालू आर्थिक वर्षको हिउँदे अधिवेशन अन्त्य भएको घोषणा गरेका हुन् । नगर सभामा प्रस्तूत आर्थिक कार्यविधि तथा वित्तीय उत्तरदायित्व ऐन २०८२ पारित भएको छ । यस्तै नगरसभाबाट घर नक्सा पास अभिलेखीकरण असार मसान्तसम्म खुल्ला गर्ने निर्णय भएको छ । यसअघि आर्थिक वर्ष २०८२ साउनदेखि घर नक्सा पास अभिलेखीकरण बन्द भएको थियो ।

यस्तै नगरसभाले कोहलपुर नगरपालिकाको कर्मचारी संगठन संरचना संशोधनसहित पारित गरेको छ । उन्नाइसौं नगर सभामा नगर उपप्रमुख संगिता सुवेदीद्वारा प्रस्तुत प्रगति समीक्षा र संशोधित बजेट पनि पारित भएको प्रमुख प्रशासकीय अधिकृत तथा सभाका सदस्य सचिव मान बहादुर गिरीले जानकारी दिए । हालसम्म विनियोजित बजेट मध्ये २८ प्रतिशत खर्च भएको छ । चालू आर्थिक वर्षका लागि विनियोजित कुल बजेट १ अर्ब १७ करोड ४५ लाख ५ हजार मध्ये ३३ करोड ५० लाख एक हजार ८४ रुपैयाँ १४ पैसा खर्च भई कुल बजेटको २८.४९ प्रतिशत बजेट खर्च भएको हो ।

जसमा चालु तर्फ ३५.११ प्रतिशत र पुँजीगततर्फ १७.६१ प्रतिशत खर्च भएको छ भने विषयगततर्फ बिनियोजित बजेटमा आर्थिक विकास तर्फ १४.२ प्रतिशत, सामाजिक विकासमा ३२.५१ प्रतिशत, पूर्वाधार विकासतर्फ ६.८९ प्रतिशत, सुशासन क्षेत्रमा १५.०१ प्रतिशत र कार्यालय संचालन तथा प्रशासनिकतर्फ ४७.५८ प्रतिशत खर्च भएको नगर उपप्रमुख सुवेदीद्वारा प्रस्तुत प्रतिवेदनमा उल्लेख छ । यस्तै चालू आर्थिक वर्षमा राजश्वतर्फ प्रक्षेपण गरिएको रकम १३ करोड ३८ लाख २१ हजार १ सय ९३ रुपैयाँ रहेकोमा हालसम्म ४ करोड ४९ लाख ८२ हजार ५ सय ६२ रुपैयाँ ९६ पैसा संकलन भएको छ । जस अनुसार हालसम्म ३३.६१ प्रतिशत राजश्व संकलन भएको छ ।

चालू आर्थिक वर्षको हालसम्म उपभोक्ता समितिबाट सम्झौता भई कार्यान्वयन भइरहेका ४८ वटा योजना रहेका छन् भने शिलबन्दी दरभाउ पत्र अन्तर्गत ५ वटा र राष्ट्रिय बोलपत्रमार्फत २८ वटा योजना विद्युतीय ठेक्का प्रणालीमार्फत खुलेकोमा १४ वटाको सम्झौता भई कार्यान्वयनको चरणमा रहेको पनि उनले बताइन् ।

प्रकाशित मिति: शुक्रबार, पुस २५, २०८२ १८:१७

प्रतिक्रिया दिनुहोस्