भगत र रुपनीलाई हरि जमुना पत्रकारिता पुरस्कार

समाचार

गृहपृष्ठ
समाचार
भगत र रुपनीलाई हरि जमुना पत्रकारिता पुरस्कार

भगत र रुपनीलाई हरि जमुना पत्रकारिता पुरस्कार

पत्रकारिता क्षेत्रमा स्वतन्त्रता र निष्पक्षताको खाँचो देखिएको छः नगर प्रमुख विष्ट

शुक्रबार, माघ ९, २०८२ बागेश्वरी पोस्ट

नेपालगञ्ज । नेपालगञ्ज उपमहानगरपालिकाका प्रमुख प्रशान्त विष्टले ब्यवसायिक पत्रकारिता लर्खराउँदा लोकतन्त्र कमजोर हुँदै गएको बताएका छन् । स्वतन्त्र पत्रकार संघ नेपाल बाँकेको आयोजनामा आज नेपालगञ्जमा सम्पन्न हरि जमुना पत्रकारिता पुरस्कार प्रदान कार्यक्रममा बोल्दै प्रमुख विष्टले पछिल्लो समय ब्यवसायिक पत्रकारिता लर्खराउँदै गएको बताए । कार्यक्रमको प्रमुख अतिथि समेत रहेका विष्टले राज्यको चौथो अंगको रुपमा रहेको पत्रकारिता क्षेत्रमा स्वतन्त्रता र निष्पक्षताको खाँचो रहेको बताउँदै लोकतन्त्रलाई बलियो बनाउन स्वस्थ पत्रकारितामा जोड दिए ।

स्वतन्त्र पत्रकार संघ नेपाल बाँके शाखाले प्रदान गर्ने हरि जमुना पत्रकारिता पुरस्कार पत्रकार भगत राम थारु र रुपनी जिएमलाई प्रदान गरिएको छ । शिक्षक तथा समाजसेवी माधबी शाहले स्वतन्त्र पत्रकार संघ नेपाल बाँके शाखामार्फत आफ्नो स्वर्गीय माता पिताको नामबाट स्थापना गरेको हरि जमुना स्मृति अक्षय कोषमार्फत उक्त पुरस्कार प्रदान गरिएको हो । स्वतन्त्र पत्रकार संघ नेपाल बाकेको आयोजनामा सम्पन्न एक विशेष समारोहका बीच पत्रकार थारु र जिएमलाई हरि जमुना पत्रकारिता पुरस्कार प्रदान गरिएको स्वतन्त्र पत्रकार संघ नेपाल बाँके शाखाका अध्यक्ष मन भण्डारीले बताए । पुरस्कृत पत्रकार द्वयलाई नेपालगञ्ज उपमहानगरपालिका प्रमुख प्रशान्त विष्ट, वरिष्ठ पत्रकार पुर्णलाल चुके, नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाई, स्वतन्त्र पत्रकार संघ नेपाल बाँकेका निवर्तमान अध्यक्ष नमस्कार शाह लगायतले नगद रासी रु. ५ हजार १ सय ५१ सहित सम्मान पत्र र दोसल्लाले सम्मान गरेका थिए ।

पुरस्कार प्रदान कार्यक्रममा बोल्दै वरिष्ठ पत्रकार चुकेले अहिलेको समयमा कुनै पनि निकायमा स्वतन्त्र ब्यक्ति पाउन मुस्किल भएको अबस्थामा स्वतन्त्र पत्रकार संघले पत्रकारिता जगतमा स्वतन्त्रताको खाँचो रहेको सन्देश दिँदै पत्रकार दलको झोले हुन नहुने बताए । नेपाल पत्रकार महासंघ लुम्बिनी प्रदेश अध्यक्ष चौलागाईले कुनै पनि राजनीतिक दलको गुलामी नबनी स्वतन्त्र र निष्पक्ष समाचार लेख्नु पत्रकारको धर्म भएको बताए । स्वतन्त्र पत्रकारिता गर्न नसक्ने ब्यक्ति पत्रकार हुन नसक्ने बताउँदै उनले भने, “आस्था र विचार भन्दा माथि उठेर पत्रकारिता गर्नु पत्रकारको धर्म हो ।”

सम्मान पश्चात बोल्दै सम्मानित पत्रकार द्वयले सम्मान पत्रकारिता क्षेत्रमा गरेको निरन्तरताको फल भएको बताउँदै नियमित रुपमा स्वतन्त्र कलम चलाउन नछोड्ने बताएका थिए । कार्यक्रममा नेपाल पत्रकार महासंघ बाँके शाखा अध्यक्ष नवीन गिरी, नेपाल पत्रकार महासंघका पूर्व केन्द्रीय सदस्य झलक गैरे, अन्तरालका कार्यकारी प्रमुख जय नारायण शाह, गैरसरकारी संस्था महासंघ नेपाल बाँके शाखाका पूर्व अध्यक्ष तेज बिक्रम शाह, हरि जमुना स्मृति अक्षय कोषकी सञ्चालक शाह लगायतले बोलेका थिए । स्वतन्त्र पत्रकार संघ बाँकेका अध्यक्ष भण्डारीको अध्यक्षतामा भएको उक्त कार्यक्रममा परस्कारको घोषणा स्वतन्त्र पत्रकार संघ नेपाल बाँकेका निवर्तमान अध्यक्ष शाहले गरेका थिए । स्वतन्त्र पत्रकार संघका उपाध्यक्ष हेमराज भट्टले स्वागत गरेको कार्यक्रम स्वतन्त्र पत्रकार संघ नेपाल बाँकेका सचिब माधव कार्कीले सञ्चालन गरेका थिए ।

प्रकाशित मिति: शुक्रबार, माघ ९, २०८२ २०:४७

प्रतिक्रिया दिनुहोस्