उद्यमीमा नयाँ उत्साह थप्दै सकियो लुम्बिनी प्रदेश स्तरीय प्रदर्शनी

समाचार

गृहपृष्ठ
समाचार
उद्यमीमा नयाँ उत्साह थप्दै सकियो लुम्बिनी प्रदेश स्तरीय प्रदर्शनी

उद्यमीमा नयाँ उत्साह थप्दै सकियो लुम्बिनी प्रदेश स्तरीय प्रदर्शनी

आइतबार, माघ १८, २०८२ बागेश्वरी पोस्ट

गणेश राई-नेपालगञ्ज । महिला उद्यमीमा नयाँ उत्साह थप्दै १०औं लुम्बिनी प्रदेश स्तरीय प्रदर्शनी–२०८२ सम्पन्न भएको छ । महिला उद्यमी संघ नेपाल बाँकेले आयोजना गरेको प्रदर्शनी नेपालगञ्ज बागेश्वरी मन्दिर परिसरमा पाँच दिनसम्म चलेको थियो । माघ १४ देखि १८ गतेसम्म आयोजना गरिएको प्रदर्शनीमा केही नयाँ उद्यमीले पहिलोपटक सहभागिता जनाएका थिए । प्रदर्शनीमा पहिलोपटक स्टल राखेर व्यापार गरेकी नेपालगञ्ज–१८ की सन्जिता बस्नेतले सुरुआतमा आउँदा लाज लागे पनि अहिले ढुक्क भएर व्यापार गर्न सक्ने भएको बताइन् । बस्नेतले व्यवसाय सुरु गरेको एक वर्ष भएको छ । छोटो अवधिमै पाएको सफलताले आफूलाई थप उत्साही बनाएको उनले बताइन् । बस्नेतले संघको नयाँ सदस्यता समेत लिइन् ।

नेपालगञ्जका महिला उद्यमीले हरेक वर्ष नियमित रुपमा आर्थिक सशक्तिकरणको लागि प्रदर्शनीको आयोजना गर्दै आएका छन् । जहाँ पश्चिम नेपालको लुम्बिनी, कर्णाली र सुदुरपश्चिम प्रदेशका महिला दिदीबहिनीहरुले उत्पादन गरेका वस्तु तथा सामग्रीहरुको बजारीकरण र प्रवद्र्धनको लागि प्रोत्साहन गर्ने गरिन्छ । समापन समारोहका प्रमुख अतिथि नेपाल महिला उद्यमी महासंघ केन्द्रिय सदस्य एवम् लुम्बिनी प्रदेश अध्यक्ष सरस्वती शर्माले सात जनाबाट सुरु गरेको महिला उद्यमी संघ बाँकले २३ वर्षको अवधिमा महिला उद्यमीको विकासमा थुप्रै योगदान गरेको बताइन् । आयोजक महिला उद्यमी संघ नेपाल बाँके अध्यक्ष रेवती सिंहले प्रदर्शनीलाई सफल बनाउन सहयोग गर्ने सम्पूर्ण उद्यमी, प्रयोजक, प्रदर्शनीमा स्टल राख्ने उद्यमी, सहयोगी दाता र मिडियाकर्मीलाई धन्यवाद दिइन् । महिला उद्यमी संघ नेपाल बाँकेको निवर्तमान अध्यक्ष साबित्रा पोख्ररेलले हरेक वर्ष प्रदर्शनीले नयाँ सफलता हासिल गर्दै नयाँ सम्भावना उजागार गर्ने गरेको उल्लेख गरिन् । संघको महासचिव विन्दु चर्तिमगरले सञ्चालन गरेको कार्यक्रममा प्रदर्शनी संयोजक एवम् संघको प्रथम उपाध्यक्ष आभा गौतम, संघको पूर्व अध्यक्ष सुशिला गौतम, संघको द्वितीय उपाध्यक्ष बबिता मैनालीले महिला उद्यमीहरुको नेतृत्व क्षमता, सीप र उत्साह बढाउनको लागि सहकार्य गरेर काम गर्ने प्रतिवद्धता जनाएका थिए ।

नेपालगञ्ज उप–महानगरपालिकाको सहयोग र केएल दुगड ग्रुपको मुख्य प्रयोजनमा भएको प्रदर्शनीको १०औं संस्करणमा कृषिजन्य सामग्री, हस्तकला सामग्री, खाद्य सामग्री, अल्लो तथा ढाकाका कपडाहरु, फ्लोरी– कल्चर, रैथाने उत्पादन, खाना तथा खाजाका परिकार, श्रृंगार तथा गर–गहना लगायतका सामग्री तथा वस्तुहरु बिक्री वितरण र प्रचारप्रसारको राखिएको संघको महासचिव चर्तिमगरले बताइन् । ६ लाख बजेट रहेको प्रदर्शनीमा ७५ वटा स्टल रहेका थिए ।

अमृता थारुलाई महिला उद्यमीको सम्मान
महिला उद्यमी अमृता कुमारी थारुलाई महिला उद्यमी संघ नेपाल बाँकेले १०औं लुम्बिनी प्रदेश स्तरीय प्रदर्शनीको दौरान सम्मान गरेको छ । राप्तीसोनारी–०६ महिमानपुर, बाँके निवासी अमृताले साया व्युटीपार्लर एण्ड टे«डिङ्ग सेन्टर सञ्चालन गर्दै आएकी छिन् । अमृताको परिवार रोजगारीका लागि भारत भएको बेला दुर्घटनामा उनको एउटा खुट्टा काटिएको थियो । ११ महिनाको हुँदा अमृताको भारतमा कुखुराको दाना बनाउने मेसिनमा खुट्टा काटिएको थियो । तर, अमृताले हिम्मतको साथ समाजमा भएका तमाम कठिनाई र चुनौतिको सामना गर्दै विगत पाँच वर्षदेखि साया व्युटीपार्लर एण्ड टे«डिङ्ग सेन्टर सञ्चालन गरेर आर्थिक रुपमा सबल बन्ने प्रयास गरिरहेकी छिन् ।

प्रकाशित मिति: आइतबार, माघ १८, २०८२ २१:२६

प्रतिक्रिया दिनुहोस्