'मत त दिन्छौँ, तर हाम्रो जीवनको सुरक्षा कसले गर्छ ?'

राजनीति

गृहपृष्ठ
राजनीति
'मत त दिन्छौँ, तर हाम्रो जीवनको सुरक्षा कसले गर्छ ?'

'मत त दिन्छौँ, तर हाम्रो जीवनको सुरक्षा कसले गर्छ ?'

बिहीबार, माघ २२, २०८२ बागेश्वरी पोस्ट

बाँके । आगामी फागुन २१ गते हुने प्रतिनिधि सभा सदस्य निर्वाचन नजिकिँदै गर्दा बाँके क्षेत्र नम्बर १ मा उम्मेदवारहरू मत माग्दै घरदैलो अभियानमा व्यस्त छन् । तर, बाँके राष्ट्रिय निकुञ्ज आसपासका बासिन्दाको मनमा चुनावी नारा भन्दा ठूलो एक प्रश्न गुञ्जिरहेको छ—“हाम्रो सुरक्षा खै ? ”

स्थानीय मतदाताहरू भन्छन्, “हामी हरेक निर्वाचनमा उम्मेदवारलाई मत दिन्छौँ । तर, वर्षौंदेखि जंगली जनावरको आक्रमणमा हामीले आफ्ना मान्छे गुमाइरहेका छौँ । के हाम्रो जीवनको मूल्य छैन ?”

यस क्षेत्रका गाउँहरूमा महिनौंपिच्छे जंगली जनावरको आक्रमणमा मानव ज्यान जाने क्रम रोकिएको छैन । खेतबारीमा काम गर्न जाँदा, घरबाट बाहिर निस्कँदा, यहाँसम्म कि आफ्नै आँगनमा पनि मानिस सुरक्षित छैनन् ।

मानव मात्र होइन, बाली नाली नष्ट भइरहेका छन्, घरपालुवा जनावर मारिएका छन्, र जीवनयापनको आधार नै धरापमा परेको छ ।

स्थानीय बासिन्दाको पीडा शब्दमा सीमित छैन—यो आक्रोश, डर र असहाय अवस्थाको चित्कार हो । “हामी जंगली जनावर भन्दा कम महत्त्वका मानव हौँ र ?” यो प्रश्न उनीहरूले उम्मेदवारहरूलाई मात्र होइन, राज्य व्यवस्थालाई पनि सोधिरहेका छन् ।

चुनावका बेला आश्वासन दिन सजिलो हुन्छ । तर, पीडितको प्रश्न स्पष्ट छ— यो समस्याको समाधान कसले गर्छ ? कसरी गर्छन् ? हाम्रो जीवनको सुरक्षा कसले सुनिश्चित गर्छ ?

बाँके राष्ट्रिय निकुञ्ज आसपासका जनताले अब नारामा होइन, निश्चिन्त जीवनको ग्यारेन्टी चाहेका छन् । उनीहरू निर्धक्क भएर खेतबारी जान चाहन्छन्, आफ्ना छोराछोरीलाई सुरक्षित भविष्य दिन चाहन्छन् ।

अब प्रश्न उम्मेदवारहरूलाई—

मत माग्न आउँदा सुन्ने हिम्मत छ कि छैन ? जंगली जनावर पीडितको आँसु पुछ्ने नीति छ कि छैन ?

प्रकाशित मिति: बिहीबार, माघ २२, २०८२ ११:४७

प्रतिक्रिया दिनुहोस्