जनता र अग्रजहरुको सम्मानमा कहिल्यै कमी हुने दिने छैन-शुधान्सु कोइराला

राजनीति

गृहपृष्ठ
राजनीति
जनता र अग्रजहरुको सम्मानमा कहिल्यै कमी हुने दिने छैन-शुधान्सु कोइराला

जनता र अग्रजहरुको सम्मानमा कहिल्यै कमी हुने दिने छैन-शुधान्सु कोइराला

बुधबार, माघ २८, २०८२ बागेश्वरी पोस्ट

नेपालगञ्ज । बाँके प्रतिनिधि सभा क्षेत्र नम्बर २ मा नेपाली कांग्रेसका उम्मेदवार शुधान्सु कोइरालाले आफूले अग्रजको सम्मानमा कहिल्यै कमी हुन नदिने प्रतिवद्धता दोहोर्याएका छन् । नेपाली कांग्रेसमा थुप्रै अग्रजले योगदान गरेको स्मरण गर्दै उनले आफूले जहिले पनि अग्रजको सम्मान गर्ने बताए । आज नेपालगञ्ज उपमहानगरपालिका वडा नम्बर २ घरबारीटोलमा नेपाली कांग्रेसको प्रचार कार्यालय उद्घाटन कार्यक्रममा कोइरालाले बाँके कांग्रेस पूर्व सभापति एवम् आदर्श व्यक्तित्व स्वर्गीय रणेन्द्रबहादुर हमालको आदर्शलाई पछ्याउने प्रतिवद्धता समेत जनाए ।

नेपाली कांग्रेसभित्र थुप्रै अग्रज नेताहरु हुँदाहुँदै पनि पार्टीले आफूलाई प्रतिनिधि सभा सदस्य पदको उम्मेदवार बनाएको भन्दै कोइरालाले अग्रज नेताहरु, बाँकेका जनताहरु र कार्यकर्ताको साथ र सहयोगले आफूले चुनाव जित्ने दावी गरे । ‘मैले विश्वास लिएको छु, नेपाली कांग्रेसले जुन क्षेत्रबाट टिकट दिएको छ, यो क्षेत्र सुशील कोइरालाको क्षेत्र हो, देशलाई संविधान दिएको सादगी नेताको क्षेत्र पनि हो । तसर्थ आफूले कहिल्यै पनि जालझेलको राजनीति नगर्ने विश्वास दिलाए । नेपाली राजनीतिमा स्वर्गीय सुशिल कोइरालाले आफूलाई सादगी र निष्ठावान नेताको रुपमा चिनाएर गएको बताउँदै भने-‘स्वर्गीय नेता सुशील कोइरालाको निष्ठामा कुनै दाग लाग्न दिने छैन ।’ आफू प्रतिनिधि सभा सदस्य पदमा निर्वाचित भएपछि सुशासनको पक्षमा र भ्रष्टाचारका विरुद्ध आवाज उठाउने प्रतिवद्धता पनि कोइरालाले दोहोर्याए । ‘संसदमा म हजूरहरुको भावनाको कदर गर्नेछु, ममा कहिल्यै पनि घमण्ड नआओस्, हामीले धेरै क्षेत्रका लागि काम गर्नुपर्नेछ, हजूरको सेवक भएर काम गर्नेछु’, उम्मेदवार कोइरालाले भने ।

नेपाली कांग्रेस नेपालगञ्ज–२ का वडा सभापति प्रदिप श्रेष्ठको सभापतित्वमा सम्पन्न कार्यक्रममा नेपाली कांग्रेस बाँकेका कार्यबाहक सभापति गोपालप्रसाद अधिकारी, नेपाली कांग्रेस क्षेत्र नम्बर २ का सभापति रमेशकुमार गुप्ता, महिला संघ बाँकेका सभापति नारायणी रुपाखेती लगायतले बोलेका थिए । कार्यक्रममा प्रजातन्त्र सेनानी रहमत अलि अन्सारी ‘मोलहे बाबा’ लाई सम्मान गरिएको थियो । मतदाता भेटघाटका क्रममा उम्मेदवार कोइरालाले बुधबार नै डुडुवा गाउँपालिकाको वडा नम्बर ३ को बाबुपुरुवा, तिवारीपुरुवा, वनकटवा, बनकट्टी, सुर्यलालपुर लगायत गाउँमा मतदातालाई भेटेका छन् । यस्तै नेपालगञ्ज उपमहानगरपालिका वडा नम्बर ६ का स्थानीय, नेपाल स्वास्थ्यकर्मी संघका पदाधिकारी तथा सदस्यहरुसहित विभिन्न वडा तथा पेशागत संगठनका पदाधिकारीलाई पनि भेटेर आफूलाई सहयोग गर्न आग्रह गरेका छन् ।

प्रकाशित मिति: बुधबार, माघ २८, २०८२ २०:०७

प्रतिक्रिया दिनुहोस्