सामाजिक संजाल कब्जा गरेर वास्तविक समस्या लुकाउन सकिन्नः नेता पुन

राजनीति

गृहपृष्ठ
राजनीति
सामाजिक संजाल कब्जा गरेर वास्तविक समस्या लुकाउन सकिन्नः नेता पुन

सामाजिक संजाल कब्जा गरेर वास्तविक समस्या लुकाउन सकिन्नः नेता पुन

बिहीबार, माघ २९, २०८२ बागेश्वरी पोस्ट

बाँके । नेपाली कांग्रेस लुम्बिनी प्रदेश सभापति एवम् बाँके क्षेत्र नम्बर ३ का उम्मेदवार अमर सिंह पुनले सामाजिक संजाल कब्जा गरेर मात्र देशको वास्तविक अवस्थालाई लुकाउन नसकिने बताएका छन् । पुनले केही राजनीतिक दलले सामाजिक संजालमा नकारात्मक टिप्पणी गरेर जनतामा भ्रम मात्र छर्ने काम गरिरहेको बताए । उनले भने, ‘नकारात्मक आलोचनाले मात्र देशको विकास गर्न सकिँदैन । नेपाली कांग्रेस नेपालको समृद्धिको नयाँ-नयाँ संकल्पको साथ जनतामाझ आएको छ । हामी सपनासहित आएका छौं । अहिलेको आवश्यकता अनुसार विकास गर्ने एजेन्डासहित आएका छौं ।’

बाँके क्षेत्र नम्बर ३ का स्थानीय जनतासँग भेटघाट गर्ने क्रममा पुनले गगन थापा र बालेन्द्र शाहबीच कुनै तुलना हुन नसक्ने बताए । उनले भने, ‘बालेन्द्र शाहले नेतृत्व गरेको काठमाडौं महानगरपालिकाले २६ प्रतिशत भन्दा धेरै कार्य सम्पादन गर्न सकेन । त्यो भन्दा धेरै विकास बैजनाथ गाउँपालिकामा भएको छ । यहाँको पालिकाले ८४ प्रतिशत भन्दा धेरै कार्यसम्पादन गरेको छ । काठमाडौं जस्तो महानगरपालिकाले गरेको विकास गति त्यही हो ।’

आवेगमा आएर देश जलाउन उकास्ने नेतृत्वबाट देश विकासको कल्पना गर्न नसकिने नेता पुनले बताए । उनले थपे, ‘उहाँहरुको आह्वानमा भएको आन्दोलनले देश जलाउने र युवाहरुको ज्यान लिने अवस्थामा लगेको थियो । हामीले सोचे जस्तो विकास भएको छैन होला । हामी युवाले चाहे जस्तो, अहिलेको आवश्यकता अनुसार विकास गर्छौं ।’ उनले समाज परिवर्तनको लागि नेपाली कांग्रेसले धेरै काम गरेको बताउँदैं भविष्यमा पनि देशको आवश्यकता अनुसार काम गर्ने बताए ।

प्रकाशित मिति: बिहीबार, माघ २९, २०८२ १९:२९

प्रतिक्रिया दिनुहोस्