किसानलाई समस्या परेका बेला बोल्ने पार्टी कांग्रेस होः अध्यक्ष तिमिल्सिना

राजनीति

गृहपृष्ठ
राजनीति
किसानलाई समस्या परेका बेला बोल्ने पार्टी कांग्रेस होः अध्यक्ष तिमिल्सिना

किसानलाई समस्या परेका बेला बोल्ने पार्टी कांग्रेस होः अध्यक्ष तिमिल्सिना

आइतबार, फागुन ३, २०८२ बागेश्वरी पोस्ट

बाँके (खजुरा) । नेपाल किसान महासंघका केन्द्रिय अध्यक्ष गणेश चन्द्र तिमिल्सिनाले किसानलाई समस्या परेका बेला बोल्ने पार्टी नै नेपाली कांग्रेस भएको बताएका छन् । नेपाली कांग्रेसले मात्र किसानका समस्या समाधान गर्न सक्ने उनको जिकिर छ । बाँकेको खजुरामा आइतबार आयोजित पत्रकार भेटघाटमा बोल्दै अध्यक्ष तिमिल्सिनाले किसानको आवाज बोल्ने पार्टीलाई मात्र आगामी फागुन २१ गते हुन लागेको प्रतिनिधि सभा निर्वाचनमा जिताउनुपर्ने बताए ।

नेपाली कांग्रेसका उम्मेदवारलाई जिताउन किसान महासंघले केन्द्रदेखि सातै प्रदेश, जिल्ला हुँदै वडा तहसम्म क्रियाशील अवस्थामा रहेका समितिलाई आवश्यक सर्कुलर गरिसकेको अध्यक्ष तिमिल्सिनाले जानकारी दिए । ‘किसान साथीभाईहरुलाई हामीले सर्कुलर गरिसकेका छौं, यस पटकको निर्वाचनमा आमकिसान दाजुभाई, दिदीबहिनीले नेपाली कांग्रेसलाई मतदान गरेर विजयी गराउनुहुनेछ,’ उनले भने ।

बाँके जिल्ला पूर्व प्रधानमन्त्री एवम् नेपाली कांग्रेसका पूर्व सभापति स्वर्गीय सुशील कोइरालाको भूमि रहेको स्मरण गर्दै अध्यक्ष तिमिल्सिनाले यही जिल्लाबाट प्रतिनिधित्व गर्दै कोइरालाले देशलाई संविधान दिएको बताए । यस्तै बाँकेको क्षेत्र नम्बर ३ कांग्रेसका तत्कालीन सह–महामन्त्री किशोरसिंह राठौर चुनाव लडेको क्षेत्र भएकाले धेरै महत्वपूर्ण योजना तथा कामहरु सम्पन्न भएको बताए । अझै पनि बाँकेको क्षेत्र नम्बर ३ मा अधुरा रहेका र सम्पन्न हुने क्रममा रहेका योजनालाई पूरा गर्नका लागि कांग्रेस लुम्बिनी प्रदेशका सभापति अमर सिंह पुनलाई मतदान गरेर जिताउनु नै उत्तम हुने उनले बताए ।

‘बाँके क्षेत्र नम्बर ३ मा जसरी कांग्रेसप्रति क्षेत्रका मतदाताहरुले २०७९ सालमा सद्भाव राख्नुभएको थियो, अहिले पनि एक इन्च कमी नगरेर अमर सिंह पुनलाई विजयी गराउन म सबै किसान दाजुभाई, दिदीबहिनीलाई अपील गर्छु,’ उनले भने । नेपाली कांग्रेसले बाँकेको क्षेत्र नम्बर १ मा नारायणप्रसाद गौडेल, क्षेत्र नम्बर २ मा शुधान्सु कोइराला र क्षेत्र नम्बर ३ मा अमर सिंह पुन जस्ता इमान्दार र योग्य व्यक्तिलाई उम्मेदवार बनाएको महासंघका अध्यक्ष तिमिल्सिनाले बताए ।

किसानहरुले भोग्दै आएका समस्यालाई महासंघले बारम्बार उठाएर सरकारलाई दवाव दिँदै आएको उनको दाबी छ । कतिपय समस्यालाई आफूहरुको पहलबाट समाधान पनि गरिएको अध्यक्ष तिमिल्सिनाले बताए । ‘हामीले किसानका धेरै समस्यालाई समाधान गराएका छौं, महासंघले नै पटक–पटक सरकारलाई ज्ञापनपत्र बुझाएको छ, किसानका समस्यालाई समाधान पनि गराएका छौं,’ उनले अगाडि थपे । पत्रकार भेटघाटमा महासंघका केन्द्रिय सदस्यहरु प्रेम खरेल, डा. बेदबहादुर केसी र हरि लामा, महासंघ लुम्बिनी प्रदेशका उपाध्यक्ष खड्ग बुढाथोकी, लुम्बिनी प्रदेशका महासचिव महेन्द्र मल्ल ठकुरी, महासंघका पूर्ब केन्द्रिय सदस्य माया सुवेदी लगायतको उपस्थिति रहेको थियो ।

प्रकाशित मिति: आइतबार, फागुन ३, २०८२ १६:४८

प्रतिक्रिया दिनुहोस्