‘नागरिकका सम्पत्ति ध्वस्त पार्ने प्रवृत्तिको अन्त्य गर्नुपर्छ’: उम्मेदवार पुन

राजनीति

गृहपृष्ठ
राजनीति
‘नागरिकका सम्पत्ति ध्वस्त पार्ने प्रवृत्तिको अन्त्य गर्नुपर्छ’: उम्मेदवार पुन

‘नागरिकका सम्पत्ति ध्वस्त पार्ने प्रवृत्तिको अन्त्य गर्नुपर्छ’: उम्मेदवार पुन

बुधबार, फागुन ६, २०८२ बागेश्वरी पोस्ट

बाँके (खजुरा) । नेपाली कांग्रेसका तर्फबाट बाँके प्रतिनिधि सभा क्षेत्र नम्बर ३ का उम्मेदवार अमर सिंह पुनले विभिन्न आन्दोलनका नाममा नागरिकका सम्पत्ति ध्वस्त पार्ने प्रवृत्तिको अन्त्य गर्नुपर्ने बताएका छन् । नेपाली कांग्रेसका लुम्बिनी प्रदेश सभापति समेत रहेका उम्मेदवार पुनले नेपाली नागरिकले दुःख पाउने र ज्यान गुमाउने खालका आन्दोलन उक्साउने कार्यको विरोध गर्दै कांग्रेसले त्यसको अन्त्यका लागि काम गर्ने बताए ।

उनले विभिन्न आन्दोलनका नाममा देशका सार्वजनिक सम्पदा, सार्वजनिक सम्पत्ति र महत्वपूर्ण कार्यालय जलाउने कार्यलाई कुनै पनि राजनीतिक दलले प्रोत्साहन दिन नहुने स्पष्ट पारे । समाज भड्काउने, धर्म, संस्कृति र जातीय विभेदलाई बढावा दिने कुनै पनि राजनीतिक दल वा नेताको भनाईमा विश्वास नगर्न पुनले बाँके क्षेत्र नम्बर ३ का मतदातालाई अनुरोध गरे ।

उनले भने, “यो देशको समृद्धि हामी सबै मिलेर गर्ने हो । हिमाल, पहाड र तराईमा बस्ने सबै नागरिकका समस्यालाई हामीले सम्बोधन गर्ने प्रयास गर्नुपर्छ । नागरिकप्रति सबै राजनीतिक दल उत्तरदायी हुनुपर्छ । तर, यहाँ नागरिकका समस्या र प्रश्नबाट भाग्ने नेताहरू पनि चुनावी मैदानमा छन् । यसले उनीहरू नागरिकप्रति कत्तिको उत्तरदायी छन् भन्ने देखाउँछ ।”

बाँके क्षेत्र नम्बर ३ को समृद्धिका लागि आफूले इमानदारीपूर्वक काम गर्ने बताउँदै पुनले भेरी–बबई डाइभर्सन तथा सिक्टा सिँचाइँ आयोजनाका अधुरा काम पूरा गर्न पहल गर्ने प्रतिबद्धता जनाए ।

प्रदेश सभापति पुनले नेपालको पूर्व मेचीदेखि पश्चिम महाकालीसम्म नेपाल–भारत सीमावर्ती क्षेत्रका नागरिकले भोगिरहेका समस्या समाधानका लागि कांग्रेसले नीतिगत रूपमा पहल थाल्ने प्रतिबद्धता व्यक्त गरे ।

लुम्बिनी प्राविधिक विश्वविद्यालयलाई बाँके क्षेत्र नम्बर ३ को समृद्धिसँग जोड्नुपर्ने उनको भनाई छ । प्राविधिक विश्वविद्यालय अहिलेको आवश्यकता भएको उल्लेख गर्दै कांग्रेस उम्मेदवार पुनले युवालाई देशमै रोजगारी सिर्जना गर्ने थलोका रूपमा विश्वविद्यालयलाई विकास गर्न जरुरी रहेको धारणा राखे ।

प्रकाशित मिति: बुधबार, फागुन ६, २०८२ २०:२४

प्रतिक्रिया दिनुहोस्