नव-युवाका लागि सकारात्मक अवसरहरू सृजना गर्ने इश्तियाकको दाबी

राजनीति

गृहपृष्ठ
राजनीति
नव-युवाका लागि सकारात्मक अवसरहरू सृजना गर्ने इश्तियाकको दाबी

नव-युवाका लागि सकारात्मक अवसरहरू सृजना गर्ने इश्तियाकको दाबी

मंगलबार, फागुन १२, २०८२ बागेश्वरी पोस्ट

नेपालगन्ज । नेकपा एमालेबाट बाँके क्षेत्र नं. २ का प्रतिनिधि सभा सदस्य उम्मेदवार मोहम्मद इश्तियाक राईले घर घर पुगेर आफ्नो पक्षमा मतदाताहरूको समर्थन जुटाउन सक्रियता बढाएका छन् । उम्मेदवार राईले आज विहान नेपालगन्जको वडा नं. १३, वडा नं. १४ र वडा नं. १८ का टोल वस्तीमा पुगेर आफ्नो निर्वाचन चिन्ह सूर्यमा मतदान गर्न मतदाताहरूसँग आग्रह गरे ।

उम्मेदवार राईले सहरी विकास तथा पूर्वाधार निर्माणलाई प्राथमिकतामा राख्दै जनताको घरदैलोमा पुगिरहेका छन् । उनले नीतिगत व्यवस्थामार्फत सामाजिक संरचनागत सुधारलाई पनि आफ्नो चुनावी अजेन्डा बनाएका छन् । भुजईगाउँमा राईले नवयुवा मतदाताहरूसँग उनीहरूको चाहनालाई आफूले कसरी सम्बोधन गर्न सक्छु भनेर जिज्ञासा राखेका थिए ।

लागुऔषधको समस्याले नेपालगन्जमा संकटको रूप लिन थालेको भन्दै राईले युवाहरूलाई कुलतबाट जोगाउन र रोजगारी, खेलकुद र सामाजिक गतिविधिहरूमा संलग्नताको अवसर बढाउन प्रयत्नरत रहेको बताउँदै आएका छन् । जेनजी उमेरमै राजनीतिमा आएर आफूलाई स्थापित गरेका राईले नवयुवाहरूको मनमा उठ्ने प्रश्नहरूबारे आफू धेरथोर जानकार रहेको पनि बताए ।

राईको आज विहानको घरदैलो नेपालगन्ज नगरपालिकाका प्रायः ग्रामिण इलाकामा केन्द्रित थियो । उनले वडा नं. १३ को लोलियनपूर्वा, वडा नं. १४ को मन्नुपूर्वा, नयाँ बस्ती र हुसेनगंज तथा वडा न १८ को भुजइ गाउँ क्षेत्रमा घरदैलो गरेका हुन् ।

प्रकाशित मिति: मंगलबार, फागुन १२, २०८२ १८:२२

प्रतिक्रिया दिनुहोस्