मुस्लिम महिलालाई मतदाता शिक्षा

समाचार

गृहपृष्ठ
समाचार
मुस्लिम महिलालाई मतदाता शिक्षा

मुस्लिम महिलालाई मतदाता शिक्षा

बुधबार, फागुन १३, २०८२ बागेश्वरी पोस्ट

नेपालगन्ज । फागुन २१ गते हुन ‘प्रतिनिधि सभा सदस्य निर्वाचन २०८२’ लाई लक्षित गरी मुस्लिम महिलाहरुलाई मतदाता शिक्षा प्रदान गरिएको छ । महिला, कानून र विकास मञ्च काठमाण्डौको सहयोगमा सूचना र मानव अधिकार अनुसन्धान केन्द्र नेपालगन्जले नेपालगन्ज–२१ विर्ता गाउँका मुस्लिम महिलाहरुलाई निर्वाचनमा मतदानका बारेमा जानकारी दिइएको हो । अभिमुखीकरणका सहभागी महिलाहरुले विभिन्न निर्वाचनमा भाग लिए पनि अहिलेसम्म मतदानबारे राम्रो ज्ञान नभएर मत बदर हुने गरेको भन्दै नागरिक शिक्षाको आवश्यकता रहेको बताएका थिए ।

कार्यक्रममा सहभागी स्थानीय महिला जमिला खानले भनिन्, –‘हामी पढे लेखेका छैनौं, मतदान गर्ने बेला विग्रिन्छ र मत बदर हुन्छ, मतदानबारे हामीलाई अरु समयमा पनि सिकाउन जरुरी छ ।’ चुनावको बेला राजनीतिक दल र उम्मेदवार सबै मत माग्न आउँछन् तर मतदान गर्ने बारे सिकाउँदैनन्, उनले भनिन् । अभिमुखीकरणमा निर्वाचन आचारसंहिता, मतदाताको अधिकार तथा भूमिका, मतपत्रबारे जानकारी, मतदान गर्न जाँदा ध्यान दिनुपर्ने कुरा लगायतका बारेमा रविन्द्र ज्ञवालीले सहजीकरण गरेका थिए । कार्यक्रममा सहभागी महिलाहरुलाई मतदानबारे अभ्यासका लागि नमूना मतदान समेत गराइएको थियो ।

प्रभावकारी मतदाता शिक्षाले निर्वाचनमा मतदाताको सहभागिता बढाउनेदेखि बदर मतको अनुपात न्यूनीकरणमा महत्वपूर्ण भूमिका निर्वाह गर्ने विश्वास लिइएको संस्थाका अध्यक्ष अधिबक्ता विश्वजित तिवारीले बताए । उनका अनुसार अभिमुखीकरणमा करिब ६५ जना मुस्लिम महिलाहरुको सहभागिता रहेको थियो ।

प्रकाशित मिति: बुधबार, फागुन १३, २०८२ २१:२२

प्रतिक्रिया दिनुहोस्