मतदाता शिक्षा कार्यक्रम संचालन

राजनीति

गृहपृष्ठ
राजनीति
मतदाता शिक्षा कार्यक्रम संचालन

मतदाता शिक्षा कार्यक्रम संचालन

शुक्रबार, फागुन १५, २०८२ बागेश्वरी पोस्ट

नेपालगन्ज । फागुन २१ गते हुने ‘प्रतिनिधि सभा सदस्य निर्वाचन २०८२’लाई लक्षित गरी नेपालगन्जमा मतदाता शिक्षा कार्यक्रम संचालन गरिएको छ । १८ बर्ष पुगी पहिलो पटक मतदान गर्ने युवा-युवतीहरुलाई मतदाता शिक्षा प्रदान गरिएको हो । महिला, कानुन र विकास मञ्च काठमाण्डौको सहयोगमा सूचना र मानव अधिकार अनुसन्धान केन्द्र नेपालगन्जले निर्वाचनमा मतदानका बारेमा जानकारी दिएको हो ।

अभिमुखीकरणका सहभागी युवाहरुले पहिलो पटक मतदानबारे राम्रो ज्ञान प्राप्त भएको बताएका थिए । उनीहरुले फागुन २१ गतेको निर्वाचनमा पहिलो पटक मतदान गर्न लागेकाले यो मतदाता शिक्षाले धेरै कुरा सिकाएको बताएका छन् भने नमूना अभ्यासले राम्रो सिकाई भएको बताएका थिए । अभिमुखीकरणमा निर्वाचन आचारसंहिता, मतदाताको अधिकार, मतदाताको कर्तव्य, स्वतन्त्र मतदान, गोप्य मतदान, मतदानको दिन पालना गर्नुपर्ने नियम, मतदानका चरण, मत बदर हुने अवस्था र मतपत्रमा ध्यान दिनुपर्ने कुरा लगायतका बारेमा राकेशकुमार मिश्र र रविन्द्र ज्ञवालीले सहजीकरण गरेका थिए ।
कार्यक्रममा सहभागीहरुलाई मतदानबारे अभ्यासका लागि नमूना मतदान समेत गराइएको थियो ।

कार्यक्रममा संस्थाका अध्यक्ष अधिबक्ता विश्वजित तिवारी, नागरिक समाजका अगुवा श्याम विष्ट, युवा अभियन्ता एञ्जिला ज्ञवालीले मतदाता शिक्षाप्रति जागरुक भई राम्रोसंग मतदान गर्नुपर्नेमा जोड दिए । प्रभावकारी मतदाता शिक्षाले निर्वाचनमा मतदाताको सहभागिता बढाउनेदेखि बदर मतको अनुपात न्यूनीकरणमा महत्वपूर्ण भूमिका निर्वाह गर्ने विश्वास लिइएको संस्थाका कार्यकारी निर्देशक मिश्रले बताए । अभिमुखीकरणमा करिब ५५ जना युवा युवायुवतीहरुको सहभागिता रहेको थियो ।

यस्तै बर्दियाका थारु महिलालाई मतदाता शिक्षा प्रदान गरिएको छ । बढैयाताल गाउँपालिकाको वडा नं. ४ का थारु समुदायका महिलाहरुलाई मतदाता शिक्षा प्रदान गरिएको हो । बर्दियाकै बढैयाताल गाउँपालिकामा मतदाता शिक्षा कार्यक्रम गरिएको छ । गाउँपालिकाको वडा नम्बर ६ का स्थानीयहरुलाई मतदाता शिक्षा प्रदान गरिएको हो ।

प्रकाशित मिति: शुक्रबार, फागुन १५, २०८२ २०:४१

प्रतिक्रिया दिनुहोस्