बाँकेमा शान्तिपूर्ण रुपमा मतदान चल्दै

समाचार

गृहपृष्ठ
समाचार
बाँकेमा शान्तिपूर्ण रुपमा मतदान चल्दै

बाँकेमा शान्तिपूर्ण रुपमा मतदान चल्दै

बिहीबार, फागुन २१, २०८२ बागेश्वरी पोस्ट

नेपालगन्ज । प्रतिनिधि सभा सदस्य निर्वाचनका लागि बाँकेमा शान्तिपूर्ण रुपले मतदान चलिरहेको छ । बाँकेका ३ वटा निर्वाचन क्षेत्रका ८१ वटा वडामा आज बिहान ७ बजे एकैसाथ मतदान सुरु भएको मुख्य निर्वाचन अधिकृत दीपककुमार दाहालले जानकारी दिए ।

'निर्वाचन शान्तिपूर्ण तरिकाले सुरु भएको छ, मतदाताहरु नजिकका केन्द्रमा पुगेर मतदान गरिरहनुभएको छ,' उनले भने ।मुख्य निर्वाचन अधिकृत दाहालका अनुसार मतदान बेलुका ५ बजेसम्म चल्नेछ । मतदानका लागि जिल्लाभर २ हजार ४ सय जना कर्मचारी खटिएका छन् ।

यस्तै ठूलो संख्यामा नेपाली सेना, नेपाल प्रहरी, सशस्त्र प्रहरी, राष्ट्रिय अनुसन्धानका कर्मचारी, निर्वाचन प्रहरी लगायत सुरक्षा अंग परिचालन भएर सुरक्षा दिइरहेका छन ।

मुख्य निर्वाचन अधिकृतको कार्यालय नेपालगन्जका अनुसार जिल्लाका तीन वटै निर्वाचन क्षेत्रबाट गरेर ३ लाख ५० हजार ३ सय ७१ जना मतदाताले मतदान गर्दैछन् । जिल्लाका ८१ वटा वडासँगै कारागारहरुमा पनि मतदान केन्द्र राखिएको छ । यसका साथै ३ वटा अस्थायी मतदान केन्द्र राखिएको छ ।

नेपालगन्ज कारागार, नौबस्ता कारागार र पशु सेवा कार्यालय परिसरमा पनि अस्थायी मतदान केन्द्र राखिएको छ । नेपालगन्ज कारागारबाट १ सय ५७ जना, नौबस्ता कारागारबाट ४६ जना कैदी बन्दीले मतदान गर्नेछन् । पशु सेवा कार्यालय परिसरमा निजामति कर्मचारी र सुरक्षाकर्मीले समानुपातिकमा मतदान गर्न पाउनेछन् ।

जिल्लाका १ सय ३९ मतदान स्थलमा ४ सय वटा मतदान केन्द्र राखिएको छ । जिल्ला निर्वाचन कार्यालय बाँकेका प्रमुख टेक बहादुर शाहीले यस पटक सबै मतदान केन्द्रहरु अशक्त, अपांगतामैत्री र जेष्ठ नागरिकमैत्री बनाइएको दाबी गरे ।

प्रकाशित मिति: बिहीबार, फागुन २१, २०८२ १०:४५

प्रतिक्रिया दिनुहोस्