क्षयरोग निवारणसम्बन्धि अभिमुखीकरण तथा निवन्ध प्रतियोगिता

स्थानीय

गृहपृष्ठ
स्थानीय
क्षयरोग निवारणसम्बन्धि अभिमुखीकरण तथा निवन्ध प्रतियोगिता

क्षयरोग निवारणसम्बन्धि अभिमुखीकरण तथा निवन्ध प्रतियोगिता

शनिबार, फागुन ३०, २०८२ बागेश्वरी पोस्ट

नेपालगन्ज । नेपाल क्षयरोग निवारण संस्था (नाटा) बाँके शाखाको आयोजनामा निबन्ध प्रतियोगिता तथा विद्यालयस्तरीय अभिमुखीकरण कार्यक्रम सम्पन्न भएको छ । क्षयरोग निवारणसम्बन्धि समुदायमा जनचेतना अभिवृद्धि गर्ने उद्देश्यले विद्यालयका बालबालिकामार्फत बढी भन्दा बढी सूचना प्रवाह गर्ने लक्ष्यसहित कार्यक्रम आयोजना गरिएको संस्थाका सभापति जनकराम भण्डारीले जानकारी दिए ।

शुक्रबार नेपालगन्जस्थित नारायण माध्यमिक विद्यालयमा जुनियर नाटा गठन गर्दै क्षयरोग निवारणसम्बन्धि अभिमुखीकरण कार्यक्रम सञ्चालन गरिएको थियो । कार्यक्रममा नाटाका पूर्व केन्द्रीय सदस्य तथा स्वास्थ्य विज्ञ सेमराज शाक्यले क्षयरोगका लक्षण, रोकथाम र उपचारबारे विस्तृत जानकारी दिएका थिए । उनका अनुसार तीन हप्ता वा सो भन्दा बढी समयसम्म लगातार खोकी लागिरहनु, छाती दुख्नु, साँझपख ज्वरो आउनु, खाना नरुच्नु, दुब्लिँदै जानु, तौल घट्दै जानु तथा खकारमा रगत देखिनु क्षयरोगका प्रमुख लक्षण हुन् ।

यसका साथै हड्डी वा हड्डीको जोर्नीमा क्षयरोग भएमा हड्डी दुख्ने, सुन्निने तथा छाला रातो हुने जस्ता लक्षण देखिन सक्छन् । ग्रन्थिमा क्षयरोग भएमा गाँठो बढ्दै जाने, पीप बग्ने तथा आन्द्रामा संक्रमण भएमा खाना कम रुच्ने र कब्जियत हुने समस्या देखिन सक्ने शाक्यले बताए । त्यस्तै मस्तिष्कमा क्षयरोग संक्रमण भए टाउको दुख्ने, बान्ता हुने तथा बेहोस हुने लक्षण देखिन सक्छ भने मुटुमा संक्रमण भए श्वास फेर्न गाह्रो हुने, थोरै हिँड्दा पनि थकान महसुस हुने तथा स्याँस्याँ हुने जस्ता समस्या देखा पर्न सक्छन् भन्ने जानकारी कार्यक्रममा दिइएको थियो ।

यसैबीच शनिबार “क्षयरोग निवारणमा युवाको भूमिका” विषयक अन्तरविद्यालय स्तरीय निबन्ध प्रतियोगिता सम्पन्न भएको छ । प्रतियोगितामा नारायण उच्च माध्यमिक विद्यालय, होलील्याण्ड इंग्लिस मिडियम स्कुल, सरस्वती माध्यमिक विद्यालय, धम्बोझी उच्च माध्यमिक विद्यालय र भेरी इंग्लिस मिडियम स्कुलका विद्यार्थीहरूको सहभागिता रहेको थियो ।

नाटा बाँकेका सभापति भण्डारीको अध्यक्षतामा सम्पन्न कार्यक्रममा केन्द्रीय सदस्य रचना श्रेष्ठ, निवर्तमान सभापति बदरुद्दीन अन्सारी, सचिव बसन्त लामिछाने, सदस्य प्रहलाद विश्वकर्मा, प्रशान्त श्रेष्ठ, विद्यालयका शिक्षक तथा विद्यार्थीहरूको उल्लेखनीय सहभागिता रहेको थियो ।

May be an image of one or more people and text