पत्रकारितामा अराजकता अस्वीकार्य : नेपाल पत्रकार महासंघ बाँके

समाचार

गृहपृष्ठ
समाचार
पत्रकारितामा अराजकता अस्वीकार्य : नेपाल पत्रकार महासंघ बाँके

पत्रकारितामा अराजकता अस्वीकार्य : नेपाल पत्रकार महासंघ बाँके

बुधबार, वैशाख १६, २०८३ बागेश्वरी पोस्ट

नेपालगञ्ज । नेपाल पत्रकार महासंघ बाँके शाखाले हालै सार्वजनिक सरोकारसँग जोडिएका केही घटनाक्रमप्रति गम्भीर ध्यानाकर्षण भएको जनाएको छ । शाखाले एक प्रेस विज्ञप्ती जारी गर्दै पत्रकारिता पेशा उच्च नैतिकता, जिम्मेवारी तथा आचारसंहितामा आधारित हुनुपर्नेमा जोड दिएको छ ।

महासंघले सम्पूर्ण पत्रकारहरूलाई आचारसंहिताको पूर्ण पालना गर्दै मर्यादित, व्यवसायिक र जिम्मेवार ढंगले सञ्चारकर्म गर्न आग्रह गरेको छ । सचिव कृष्ण ओलीद्वारा जारी विज्ञप्तीमा पत्रकारिताको नाममा गरिने कुनै पनि प्रकारको अराजक गतिविधि महासंघको मूल्य, मान्यता र धर्मभित्र नपर्ने स्पष्ट पारिएको छ । साथै, आचारसंहिता विपरीतका कार्यमा संलग्न हुने पत्रकारले त्यसबाट उत्पन्न परिस्थितिको जिम्मेवारी स्वयं वहन गर्नुपर्ने उल्लेख गरिएको छ ।

यसैबीच, भेरी अस्पतालसँग सम्बन्धित पछिल्लो घटनाप्रति महासंघ बाँके शाखाले गम्भीर चासो व्यक्त गरेको छ । उक्त घटनाको निष्पक्ष, पारदर्शी र विश्वसनीय छानबिन गर्न सम्बन्धित निकायसँग माग गरिएको छ । साथै, घटनामा संलग्न दोषीहरूलाई कानुन बमोजिम कारबाही गर्न पनि जोडदार माग गरिएको छ ।

महासंघले प्रेस तथा अभिव्यक्ति स्वतन्त्रताको संरक्षणमा ‘शून्य सहनशीलता’ को नीति अवलम्बन गर्दै पत्रकारहरूको भौतिक तथा पेशागत सुरक्षाका पक्षमा सधैँ दृढ रहने प्रतिबद्धता व्यक्त गरेको छ । तर, पत्रकारका नाममा गरिने अराजकता तथा आचारसंहिता विपरीतका गतिविधिप्रति कुनै समर्थन नरहने स्पष्ट पारेको छ ।

महासंघले सम्पूर्ण पत्रकारहरूलाई सत्य, निष्पक्षता र जिम्मेवारीका मूल्य-मान्यतामा अडिग रहँदै आफ्नो पेशागत दायित्व गम्भीरतापूर्वक निर्वाह गर्न अपिल गरेको छ ।

May be an image of text