सीपसँग जोडिँदै कोहलपुरका युवा

स्थानीय

गृहपृष्ठ
स्थानीय
सीपसँग जोडिँदै कोहलपुरका युवा

सीपसँग जोडिँदै कोहलपुरका युवा

बिहीबार, असार ११, २०८३ बागेश्वरी पोस्ट

कोहलपुर । कोहलपुर नगरपालिकाले युवालाई सीपमूलक तालिममार्फत रोजगारी र स्वरोजगारसँग जोड्ने उद्देश्यले मोबाइल मर्मत तथा हाते कढाइ तालिम प्रदान गरेको छ । नगरपालिकाको आयोजनामा सञ्चालन गरिएको ३९० घण्टे तालिम विहीबार समापन गरिएको हो । वैशाख १६ गतेदेखि सुरु भएको तालिममा खुला प्रतिस्पर्धामार्फत सहभागी छनोट गरी प्रशिक्षण प्रदान गरिएको थियो ।

कोहलपुर नगरपालिकाका रोजगार संयोजक आशिष वर्माका अनुसार मोबाइल मर्मततर्फ २० जना र हाते कढाइतर्फ २० जना गरी कुल ४० जनाले तालिममा सहभागिता जनाएका थिए । तालिमको प्राविधिक सहयोग नेशनल मानस विकास ट्रेनिङ इन्स्टिच्युट प्रालि र आदर्श इन्टरनेशनल ट्रेनिङ इन्स्टिच्युट प्रालिले गरेका थिए ।

समापन कार्यक्रम कोहलपुर नगरपालिकाकी आर्थिक विकास समितिकी संयोजक अनिता बुढा क्षेत्रीको सभापतित्व तथा नगर उपप्रमुख संगिता सुवेदीको प्रमुख आतिथ्यतामा सम्पन्न भएको थियो । तालिममा सहभागी रमेश सुनारले मोबाइल मर्मतसम्बन्धी सीप हासिल गरेपछि आफूलाई रोजगारीतर्फ अघि बढ्ने नयाँ आधार प्राप्त भएको बताए । उनले सिकेको ज्ञान र सीपलाई व्यवहारमा उतार्दै आत्मनिर्भर बन्ने प्रतिबद्धता व्यक्त गरे । त्यस्तै हाते कढाइ तालिमकी सहभागी मनिषा चौधरीले तालिमपछि आफूमा आत्मविश्वास बढेको र अब सीपलाई आयआर्जनको माध्यम बनाउने उत्साह जागेको बताइन् ।

समापन कार्यक्रममा बोल्दै नगर उपप्रमुख सुवेदीले कोहलपुर नगरपालिकाले स्थानीय आवश्यकता र बजारको मागका आधारमा विभिन्न सीपमूलक तालिम सञ्चालन गर्दै आएको बताइन् । नगरपालिकाले खुला सूचना जारी गरी इच्छुक नागरिकलाई सीप सिकाएर आत्मनिर्भर बनाउने अभियानलाई निरन्तरता दिएको उल्लेख गर्दै उनले तालिमबाट सहभागीहरूले सकारात्मक प्रतिफल प्राप्त गर्ने विश्वास व्यक्त गरिन् । सामाजिक विकास समितिका संयोजक ईश्वरीप्रसाद विकले मोबाइल मर्मत तथा हाते कढाइ दुवै क्षेत्रमा बजारको राम्रो सम्भावना रहेको बताउँदै सिकेको सीपलाई व्यवहारमा प्रयोग गर्न सहभागीलाई आग्रह गरे ।

नेशनल मानस विकास ट्रेनिङ इन्स्टिच्युट प्रालिका प्रबन्ध निर्देशक राकेश रोशन धमालले तालिमपछि सीप परीक्षण तथा प्रमाणीकरण प्रक्रियामा सहभागी हुन सुझाव दिएका थिए । तालिममा हेमनारायण चौधरी र दीपिका देवकोटाले प्रशिक्षकको भूमिका निर्वाह गरेका थिए । समापन कार्यक्रममा नगर उपप्रमुख सुवेदी, प्रमुख प्रशासकीय अधिकृत मानबहादुर गिरी लगायतले प्रशिक्षार्थीहरूलाई प्रमाणपत्र वितरण गरेका थिए । स्थानीय तहबाट सञ्चालन गरिएका यस्ता सीपमूलक कार्यक्रमले बेरोजगार युवा तथा महिलालाई स्वरोजगारतर्फ आकर्षित गर्नुका साथै स्थानीय स्तरमै आयआर्जनका अवसर सिर्जना गर्न महत्वपूर्ण भूमिका खेल्ने रोजगार संयोजक वर्माले बताए ।

प्रकाशित मिति: बिहीबार, असार ११, २०८३ २०:४५

प्रतिक्रिया दिनुहोस्