विपद् जोखिम व्यवस्थापन स्थानीयकरण तालिम सम्पन्न

स्थानीय

गृहपृष्ठ
स्थानीय
विपद् जोखिम व्यवस्थापन स्थानीयकरण तालिम सम्पन्न

विपद् जोखिम व्यवस्थापन स्थानीयकरण तालिम सम्पन्न

शनिबार, असार १३, २०८३ बागेश्वरी पोस्ट

नेपालगञ्ज । शहरी विपद् तथा भूकम्पीय पूर्व तयारी (सुपर) परियोजनाको आयोजनामा दुई दिने विपद् जोखिम व्यवस्थापन स्थानीयकरण तालिम नेपालगञ्जमा सम्पन्न भएको छ । तालिममा विपद् जोखिमको बुझाई, विपद् जोखिम न्यूनीकरण तथा व्यवस्थापन नीति र नेपाल सरकारका प्राथमिकताहरु, कानुनी प्रवद्र्धन, स्थानीय विपद् व्यवस्थापन समितिको भूमिका र जिम्मेवारी, स्थानीय तहमा विपद् व्यवस्थापन कोष परिचालन, क्षति तथा आवश्यकता मूल्यांकन, पूर्व सूचना प्रणाली, जलवायू उत्थानशीलता योजना लगायत विषयमा प्रशिक्षण दिएको थियो ।

तालिममा नेपालगञ्ज उपमहानगरपालिकाको १ देखि २३ वडासम्मका वडा सचिवहरु, नगर प्रहरी प्रमुख बारुणयन्त्र प्रमुख र नेपाल रेडक्रस सोसाइटी बाँकेका प्रतिनिधिहरुको सहभागिता रहेको थियो । संयुक्त राष्ट्रसंघीय विकास कार्यक्रम (युएनडिपी) र नेपाल रेडक्रस सोसाइटीको साझेदारीमा नेपालगञ्ज उपमहानगरपालिकाको समन्वयमा उक्त परियोजना सञ्चालन भइरहेको छ । कार्यक्रममा नेपालगञ्ज उपमहानगरपालिका वडा नम्बर ६ का वडा अध्यक्ष एवं सुपर परियोजना संयोजक समीर प्रताप सिंहको अध्यक्षतामा सम्पन्न कार्यक्रममा नेपालगञ्ज उपमहानगरपालिकाका निमित्त प्रमुख प्रशासकीय अधिकृत गोर्खबहादुर थापा, नेपाल रेडक्रस सोसाइटी बाँके शाखाका सभापति गोवद्र्धन सिंह सम्झना, मन्त्री अजीज अहमद सिद्धिकी, कोषाध्यक्ष राकेशबहादुर श्रीवास्तव लगायतले विपद् जोखिम व्यवस्थापन स्थानीयकरणमा वडा सचिवहरुको महत्वपूर्ण भूमिका रहेको उल्लेख गरे ।

तालिमको सहजीकरण डिपीनेट नेपालका उपाध्यक्ष केश्वदत्त भट्ट, नेपाल रेडक्रस सोसाइटी केन्द्रीय कार्यालयका कार्यक्रम संयोजक शेरबहादुर कार्की र स्थानीय आपतकालीन कार्यसञ्चालन केन्द्र नेपालगञ्जका सूचना व्यवस्थापन अधिकृत रुपन ज्ञवालीले गरेका थिए भने कार्यक्रम सञ्चालन र व्यवस्थापन नेपाल रेडक्रस सोसाइटी बाँकेका कार्यक्रम अधिकृत प्रहलाद विश्वकर्माले गरेका थिए ।

प्रकाशित मिति: शनिबार, असार १३, २०८३ २१:३३

प्रतिक्रिया दिनुहोस्