खजुरा गाउँपालिकामा सुधारिएको चुलो वितरण

स्थानीय

गृहपृष्ठ
स्थानीय
खजुरा गाउँपालिकामा सुधारिएको चुलो वितरण

खजुरा गाउँपालिकामा सुधारिएको चुलो वितरण

शनिबार, असार १३, २०८३ बागेश्वरी पोस्ट

खगेन्द्र दाहाल - खजुरा । बाँकेको खजुरा गाउँपालिकामा सुधारिएको चुलो वितरण गरिएको छ । एकल महिला, दलित, जनजाति, महिला घरमूली भएको घरलाई विशेष प्राथमिकता दिई चुलो प्रदान गरिएको हो । परम्परागत चुलोबाट निस्कने धुवाँले गर्दा महिला र बालबालिकामा लाग्ने श्वासप्रश्वास सम्बन्धी रोगहरू दम, खोकी कम हुने भएकोले चुलो वितरणपछि स्वास्थ्यमा सुधार हुने अपेक्षा लिइएको खजुरा गाउँपालिका प्रमुख प्रशासकीय अधिकृत दिल बहादुर पौडेलले जानकारी दिए ।

खजुरा गाउँपालिकामा रहेको सामूहिक आवासका १७ घरधुरीसहित ३ सय जनालाई अहिले सुधारिएको चुलो वितरण गरिएको खजुराका योजना शाखा सहायक तथा वैकल्पिक उर्जा कार्यक्रम फोकल पर्सन तारा थापाले जानकारी दिइन् । खजुराले गत वर्ष पनि सुधारिएको चुलो वितरण गरेको थियो । गत वर्ष ४ सय वितरण गरिएकोमा अहिले थप सुधारिएको चुलो ३ सय घरधुरीको लागि छुट्टाइएको बजेटबाट वितरण गरिएको पालिकाले जनाएको छ । भान्सा सुधार गर्नका लागि विद्युती इलेक्ट्रिक चुलो गत वर्ष ४५० घरधुरीका लागि खजुराले वितरण गरिसकेको अवस्था छ । यस वर्ष पनि विद्युतीय चुलो वितरण गरिसकेको पालिकाले ८६० घरधुरीका एकल महिला, दलित, जनजाति, महिला घरमूली भएको घरलाई प्रदान गरेको हो ।

आगामी आर्थिक बर्ष २०८३/०८४ मा थप १२ सय घरधुरीलाई वितरण गर्ने गरी १० लाख बजेट विनियोजन गरिएको योजना शाखा सहायक तथा वैकल्पिक उर्जा कार्यक्रम फोकल पर्सन थापाले जनाइन् । खजुरा गाउँपालिकामा सुधारिएको चुलो वितरण गर्दा स्थानीय बासिन्दाहरूलाई, विशेष गरी ग्रामीण क्षेत्रका महिलाहरूलाई धेरै ठूलो राहत पुगेको खजुरा गाउँपालिका अध्यक्ष डम्बर बहादुर विकले बताए । सुधारिएको चुलोले कम दाउरामा छिटो खाना पकाउने हुनाले दाउरा संकलन गर्ने समय र श्रम दुवै जोगिने अध्यक्ष विकले उल्लेख गरे । वातावरण संरक्षण, दाउराको खपत कम हुँदा वनजंगल फँडानी रोक्न र वातावरण सन्तुलन राख्न मद्दत पुग्ने अपेक्षा पालिकाले लिएको खजुरा गाउँपालिकाका उपाध्यक्ष मन्जु मल्लले जनाइन् । स्थानीय सरकार र सरोकारवाला निकायको यस्तो कदमले समुदायको स्वास्थ्य र वातावरण दुवैमा दीर्घकालीन रूपमा राम्रो प्रभाव पार्ने स्थानीय बताउँछन् ।

प्रकाशित मिति: शनिबार, असार १३, २०८३ २१:५९

प्रतिक्रिया दिनुहोस्